Handbolti

Lilja valin í landsliðið í fyrsta sinn

Ingvi Þór Sæmundsson skrifar
Lilja Ágústsdóttir er nýliði í íslenska landsliðinu.
Lilja Ágústsdóttir er nýliði í íslenska landsliðinu. vísir/hulda margrét

Valskonan Lilja Ágústsdóttir hefur verið kölluð inn í íslenska landsliðið í handbolta og gæti leikið sína fyrstu A-landsleiki um helgina.

Unnur Ómarsdóttir, leikmaður KA/Þórs, meiddist á landsliðsæfingu fyrr í vikunni og þurfti að draga sig út úr landsliðshópnum af þeim sökum. Í stað hennar hóaði landsliðsþjálfarinn Arnar Pétursson í Lilju.

Ísland mætir Færeyjum í tveimur vináttulandsleikjum ytra um helgina. Þeir eru liður í undirbúningi fyrir leikina tvo gegn Ísrael í forkeppni HM í byrjun næsta mánaðar. Ísland og Ísrael mætast 5. og 6. nóvember og fara báðir leikirnir fram á Ásvöllum.

Hildigunnur Einarsdóttir fer ekki með íslenska landsliðinu til Færeyja en ætti að ná leikjunum tveimur gegn Ísrael.

Lilja, sem er átján ára, var í stóru hlutverki í íslenska liðinu sem lenti í 8. sæti á HM U-18 ára í sumar. Hún leikur jafnan í vinstra horni en getur einnig spilað fyrir utan.

Katrín Tinna Jensdóttir, leikmaður Volda í Noregi, var kölluð inn í landsliðið fyrr í vikunni eftir að Lovísa Thompson og Berglind Þorsteinsdóttir drógu sig út úr landsliðshópnum.

Ísland og Færeyjar eigast við í Skála á laugardaginn og Klaksvík á sunnudaginn. Um þarnæstu helgi er svo komið að viðureignunum tveimur gegn Ísrael.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.