Flórída á sér langa sögu í framleiðslu appelsínusafa. Framleiðslan náði hámarki á árunum 1997 til 1998 þegar um 244 milljónir askja af appelsínum voru seldar á markað. Síðan þá hefur appelsínurækt dregist statt og stöðugt saman.
Plágur á alla bóga
Í upphafi þessa árs reiknaði bandaríska landbúnaðarráðuneytið með því að framleiðslan á uppskerutímabilinu 2022 til 2023 yrði 44,5 milljónir askja. Var það ekki síst vegna þess að plága hafði herjað á appelsínubændur í Flórída. Plágan lýsti sér þannig að appelsínurnar féllu til jarðar af trjánum áður en þær höfðu náð fullum þroska. En á heilbrigðu appelsínutré hanga ávextir þess þar til þeir hafa náð fullum þroska og svo týndir af trjánum. Eins og áður sagði þá gjöreyðilagði fellibylurinn Ian stóran hluta þess hluta uppskerunnar sem þó var í lagi. Í ofanálag hafa ræktendur í Flórída glímt við kaldara loftslag í haust en þeir eiga að venjast.
Uppskera þessa árs í Flórída hefur nú verið endurskoðuð aftur niður á við í 28 milljónir askja. Verð á framvirkum samningum með appelsínusafa sem ICE-kauphöllin hefur á sínum snærum hefur í kjölfarið rokið upp. Framvirki samningurinn með appelsínusafa gengur kaupum og sölum í 15 þúsund punda einingum, eða sem nemur um 6,8 tonnum. Samningurinn er nú kominn yfir 200 Bandraríkjadali fyrir 6,8 tonn af appelsínusafa til afhendingar í næsta mánuði. Hefur verðið nú hækkað um 55 prósent á einu ári.
Brasilía í betri málum
Þróunin í Flórída er vatn á myllu Brasilíu sem er stærsti framleiðandi appelsínusafa í heiminum. Þvert á það sem er að eiga sér stað í Bandaríkjunum er því spáð að framleiðslan í Brasilíu á yfirstandandi uppskeruári aukist um meira en 20 prósent. Það þýðir að heildarframleiðsla Brasilíu er áætluð um 317 milljónir askja, samkvæmt mati Fundecitrus, samtaka framleiðenda sítrusávaxta þar í landi.
