Viðskipti erlent

Spáð að þessi verði fyrsta rafknúna farþegaflugvélin

Kristján Már Unnarsson skrifar
Rafmagnsflugvélin Alice komin á loft í fyrsta flugtakinu 27. september síðastliðinn.
Rafmagnsflugvélin Alice komin á loft í fyrsta flugtakinu 27. september síðastliðinn. Eviation

Þegar rafmagnsflugvélin Alice hóf sig til flugs fyrir tólf dögum frá Grant County-alþjóðaflugvellinum í Washington-ríki í Bandaríkjunum sagði CNN-fréttastofan að hún væri fyrsta farþegaflugvél heims, sem alfarið væri rafknúin, til að taka flugið. Þetta fyrsta reynsluflug hennar varði í átta mínútur og fór hún í 3.500 feta hæð.

Tveimur mánuðum áður höfðu Guðni Th. Jóhannesson, forseti Íslands, og Katrín Jakobsdóttir forsætisráðherra flogið sem fyrstu flugfarþegarnir hérlendis með fyrstu rafmagnsflugvél Íslendinga, hinni tveggja sæta TF-KWH. Sú er af gerðinni Pipistrel Velis. 

Rafmagnsflugvélin TF-KWH dregin út úr flugskýli Geirfugls í Fluggörðum í sumar. Frumkvöðlarnir Friðrik Pálsson og Matthías Sveinbjörnsson draga vélina ásamt sænska flugkennaranum Rickard Carlsson.Einar Árnason

Með flughæfisskírteini Flugöryggisstofnunar Evrópu varð Pipistrel fyrsta rafmagnsflugvél heims til að hljóta alþjóðlega vottun til almannaflugs. Hún má því teljast fyrsta rafknúna farþegaflugvélin.

Litla Pipistrel-vélin er hins vegar ætluð sem kennsluflugvél, fyrir einn flugkennara með einn flugnema. Þótt flugmaður geti jafnframt nýtt hana til að fljúga með einn farþega mun hún seint teljast valkostur í arðbært farþegaflug á vegum flugfélaga.

Rafmagnsflugvél Eviation er tveggja hreyfla og eru hreyflarnir aftast á vélinni.Eviation

Eftir fyrsta flugið þann 27. september síðastliðinn telst Alice núna einna líklegust til að verða fyrsta rafmagnsflugvélin sem flugfélög munu taka í notkun til almenns farþega- og vöruflugs. 

Framleiðandinn, fyrirtækið Eviation, ísraelskt að uppruna en staðsett í Bandaríkjunum, hyggst þó gefa sér nægan tíma til að tryggja að þegar að þeim tímapunkti kemur verði hún orðin öruggur farkostur. Eviation áætlar að taka næstu fjögur til fimm ár til frekari þróunar og flugprófana og stefnir að því að hún verði tilbúin til afhendingar árið 2027.

Fyrsta flugið varði í átta mínútur og fór hún í 3.500 feta hæð. Áætlað er að hún geti flogið í allt að 32.000 feta hæð.Eviation

Alice er gerð til að bera níu farþega og tvo flugmenn. Flughraði hennar í farflugi er áætlaður verða 480 kílómetrar á klukkustund og flugdrægið 460 kílómetrar, sem þýðir að hún gæti hentað íslensku innanlandsflugi. Áætlað er að 30 mínútur taki að hlaða rafgeymana á milli flugferða og að hún þurfi 840 metra langa flugbraut til flugtaks.

Fyrstu flugferðinni fagnað á Grant County-flugvellinum í Washington-ríki.Eviation

Eviation hyggst bjóða flugvélina í þremur útfærslum; sem níu sæta farþegaflugvél, sem fimm sæta forstjóraflugvél með lúxusinnréttingu og sem vöruflutningavél. Fyrsta flugfélagið til að kaupa hana var hið bandaríska Cape Air, sem pantað hefur 75 eintök. Deutsche Post hefur pantað 12 flugvélar til að nýta í samstarfi við DHL fyrir pakkasendingar. Þá tilkynnti GlobalX Airlines í september að það hefði pantað 50 flugvélar.

Hér má sjá myndband Eviation af fyrsta flugi rafmagnsflugvélarinnar Alice:


Tengdar fréttir

Viljayfirlýsing Icelandair gerir ráð fyrir fimm rafknúnum flugvélum

Icelandair gerir ráð fyrir að fá fimm rafmagnsflugvélar í innanlandsflugið í viljayfirlýsingu, sem félagið skrifaði undir í síðustu viku. Ráðamenn Icelandair telja raunhæft að orkuskiptin í farþegafluginu hefjist fyrir lok þessa áratugar.

For­setinn fyrstur far­þega í raf­magns­flug­vél

Blað var brotið í íslenskri flugsögu í gær með fyrsta farþegaflugi rafmagnsflugvélar hér á landi. Forseti Íslands og forsætisráðherra voru fyrstu farþegar vélarinnar og segja flugið marka vatnaskil í vegferð Íslands í átt að hreinni orku í loftsamgöngum. 

Flugvél flýgur í fyrsta sinn í sögunni á íslenskri raforku

Fyrsta rafmagnsflugvél Íslendinga hóf sig til flugs í fyrsta sinn á Íslandi nú síðdegis frá flugvellinum á Hellu á Rangárvöllum. Þetta var jafnframt í fyrsta sinn sem flugvél flaug á íslenskri orku en ekki innfluttu jarðefnaeldsneyti.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×