Erlent

Neitar því að hafa borgað þungunarrof kærustu

Samúel Karl Ólason skrifar
Herschel Walker, vill sæti á öldungadeild Bandaríkjaþings og nýtur stuðnings Donalds Trumps.
Herschel Walker, vill sæti á öldungadeild Bandaríkjaþings og nýtur stuðnings Donalds Trumps. GettY/Megan Varner

Herschel Walker, frambjóðandi Repúblikanaflokksins til annars öldungadeildarþingsætis Georgíu-ríkis, þvertekur fyrir það að hafa greitt fyrir þungunarrof fyrrverandi kærustu sinnar árið 2009. Því hefur verið haldið fram í fjölmiðlum vestanhafs en Walker segist mikill andstæðingur þess að konur eigi rétt á þungunarrofi.

Walker nýtur stuðnings Donalds Trumps, fyrrverandi forseta Bandaríkjanna, en er verulega umdeildur.

Hann hefur meðal annars sagt að hann vilji banna það alfarið, jafnvel í tilfellum nauðgunar og sifjaspells og jafnvel þó þungun ógni lífi móður. Þá hefur hann líkt þungunarrofi við morð.

Daily Beast birti frétt um hið meinta þungunarrof og greiðsluna frá Walker í gær. Blaðamaður miðilsins talaði við konuna um málið og sýndi hún honum kvittun fyrir aðgerðinni, kvittun vegna innlagnar í banka sem með fylgdi mynd af ávísun sem Walker hafði skrifað nafn sitt á og bréf þar sem hann á að hafa óskað henni skjóts bata.

Walker var spurður út í ávísunina í viðtali á Fox News í gær. Þá sagðist hann senda fullt af fólki pening. Hann væri gjafmildur. Hann sagði það sama um bréfið, eða það að hann sendi fullt af fólki allskonar bréf.

Sonur Walkers, sem heitir Christian, hefur þó stigið fram og gagnrýnt hann harðlega. Christian Walker hefur meðal annars sakað föður sinn um að hafa hótað sér og móður sinni lífláti og segir að þau hafi ítrekað þurft að flýja undan ofbeldi hans.

Hann sagði Herschel vera að ljúga því að hann væri réttsýnn kristinn maður og hið sanna væri að hann hefði varið ævinni í að rústa lífum annarra.

„Allir fjölskyldumeðlimir Herschel Walker báðu hann um að bjóða sig ekki fram, því við vissum öll að fortíð hans myndi koma á yfirborðið,“ sagði Christian í tístunum.

Repúblikanar hafa í dag sagst styðja Walker og meðal annars sakað Demókrata um að ljúga upp á hann. Þeir hafa meðal annars gefið í skyn að um einhvers konar samsæri Demókrata sér að ræða.

Lög Georgíu segja til um að stjórnmálaflokkar megi ekki skipta um frambjóðenda svo nærri kosningum. Þá hafa Repúblikanar bundið miklar vonir við að Georgía og Herschel hjálpi þeim að ná meirihluta í öldungadeild Bandaríkjaþings í þingkosningunum í nóvember.

Washington Post segir að öldungadeildarframbjóðendur Repúblikanaflokksins í mikilvægum ríkjum hafi ekki verið að gera gott mót í könnunum. Walker sé þó ekki einn þeirra. Flestar kannanir sýna hann stutt á hæla Raphael G. Warnock, öldungadeildarþingmanns Demókrataflokksins. 

Mitch McConnell, leiðtogi Repúblikana í öldungadeildinni, sagði nýverið að Repúblikanar teldu góðar líkur á því að þeir gætu náð þingsætum Georgíu.

Miðað við kannanir eru líkur á því að Demókratar haldi meirihluta í öldungadeildinni og jafnvel bæti við sig sætum.

Það sama er ekki upp á teningnum í fulltrúadeildinni. Þar eru líkur á því að Repúblikanar nái meirihluta. Kannanir sýna þó að dregið hefur úr þeim líkum og þá sérstaklega eftir að Hæstiréttur Bandaríkjanna felldi stjórnarskrárbundinn rétt kvenna til þungunarrofs úr gildi.


Tengdar fréttir

Gætu breytt band­a­rísk­u sam­fé­lag­i næst­u ár­a­tug­in­a

Hæstiréttur Bandaríkjanna kemur saman á morgun í fyrsta sinn frá því í júní en dómararnir munu taka fyrir mörg stór og umdeild mál á næstu mánuðum. Búast má við því að dómarar sem skipaðir voru af forsetum úr Repúblikanaflokknum, sem eru í miklum meirihluta (6-3), muni halda áfram að færa bandarískt samfélag til hægri.

Segir MAGA-Rep­úbl­ik­an­a ógna Band­a­ríkj­un­um

Joe Biden, forseti Bandaríkjanna, fór hörðum orðum um Donald Trump, forvera sinn og stuðningsmenn hans, í ræðu sem hann hélt í gærkvöldi. Biden sagði að svo lengi sem Trump stjórnaði Repúblikanaflokknum ógnaði flokkurinn lýðræði í Bandaríkjunum.

Er rauða flóðbylgjan að verða að smá skvettu?

Svo virðist sem að sú „rauða flóðbylgja“ sem spáð hefur verið að skelli á Bandaríkjunum í þingkosningunum í nóvember, ætli ekki að raungerast. Undanfarna mánuði hafa Repúblikanar virst í góðri stöðu til að ná völdum í fulltrúadeild Bandaríkjaþings og mögulega öldungadeildinni einnig.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×