Var bannað að tala um varnarvegg eftir fráfall Díönu

Þetta segir Mark Lawrenson, fyrrverandi álitsgjafi hjá BBC. Honum var sagt upp störfum hjá BBC fyrr á þessu ári eftir að hafa starfað þar í þrjá áratugi.

Í viðtali við The Sunday Times ber Lawrenson sig illa og segist hafa verið rekinn því hann er 65 ára hvítur karlmaður, eins og hann orðar það.

Lawrenson kvartar einnig sáran yfir því að hin svokallaða woke menning hafi náð fótfestu innan BBC og álitsgjafar megi ekki lengur segja það sem þeir vilja. Þetta virðist þó ekki vera nýtt af nálinni því Lawrenson tekur aldarfjórðungs gamalt dæmi um að lýsendur og álitsgjafar BBC voru beðnir um að passa orðanotkun sína eftir að Díana prinsessa lést í bílslysi í lok ágúst 1997.

Díana og kærasti hennar, Dodi Fayed, létust þegar bíll sem þau voru farþegar í var ekið á vegg í París árla morguns. Sex dögum eftir bílslysið var Lawrenson að vinna fyrir BBC við leik Bradford City og Sunderland í B-deildinni. Hann segir að yfirmenn sínir hafi beðið hann að tala ekki um varnarvegg þegar lið fengu aukaspyrnu á hættulegum stað.

„Ég man ekki hverjum ég var að lýsa með en ég spurði hann hvort þetta væri svona í alvöru og hann svaraði játandi,“ sagði Lawrenson.

Hann naut mikillar velgengni með Liverpool á árunum 1981-88 og varð meðal annars fimm sinnum enskur meistari með liðinu og einu sinni Evrópumeistari. Lawrenson lék 39 landsleiki fyrir Írland og skoraði fimm mörk.