Fótbolti

Arna Sif: Þvílíkt högg í magann

Atli Arason skrifar
Arna Sif Ásgrímsdóttir í leik með Val.
Arna Sif Ásgrímsdóttir í leik með Val. Vísir/Vilhelm

Arna Sif Ásgrímsdóttir, leikmaður Vals og íslenska landsliðsins, gerði upp tapið gegn Hollandi í lokaleik undankeppni HM á þriðjudaginn sl. með Helenu Ólafsdóttur og Mist Edvardsdóttur í Bestu mörkunum.

Arna Sif var í hópnum sem fór til Hollands en hún sat allan leikinn á varamannabekknum.

„Upplifunin okkar á bekknum var þannig að maður var alltaf að horfa á klukkuna en aldrei leið tíminn,“ sagði Arna en innslagið í heild úr Bestu mörkunum má sjá í spilaranum hér að neðan.

„Svo var maður aðeins farinn að leyfa sér að dreyma að þetta væri komið en svo var þetta þvílíkt högg í magann að fá markið á sig þarna undir lokin. Maður fann það bara á öllum, stemningin eftir leik í bæði mat og upp á hóteli, það voru allir mjög sárir,“ bætti Arna við.

Hollendingar unnu leikinn 1-0 með marki Esmee Brugts á 93. mínútu leiksins og Ísland var aðeins 90 sekúndum frá því að komast beint á HM. Vonin er þó ekki alveg úti en framundan er umspil þar sem Ísland mætir annað hvort Belgíu eða Portúgal ytra.

„Fyrstu viðbrögð þegar flautað var af, þá helltist yfir mann miklar tilfinningar en strax inn í klefa eftir leik var farið að tala um að þetta er alls ekki búið. Það er annar séns og ég held það sé mikil tilhlökkun fyrir því verkefni,“ sagði Arna um framhaldið.

Mist Edvardsdóttir, samherji Örnu hjá Val, sagði að Holland ætti sigurinn skilið og ótrúlegt að þær hefðu ekki skorað fleiri mörk.

„það var hálf ótrúlegt miðað við öll þau færi sem Holland skapaði sér í þessum leik, að þetta hafi verið markið sem fór inn og á þessum tímapunkti,“ sagði Mist og bætti við að sárast væri að tapa leiknum á þennan hátt.

„Eins og leikurinn er skemmtilegur þá getur hann orðið ógeðslegur á svona augnablikum,“ sagði Helena Ólafsdóttir. Umræðuna má sjá hér að neðan.

Klippa: Arna Sif: Þvílíkt högg í magann

Tengdar fréttir

„Held að það sé mjög mikill séns þarna“

Valsvarnarmúrinn, sem þær Mist Edvardsdóttir og Arna Sif Ásgrímsdóttir hafa mótað svo myndarlega í sumar, telur líklegast að Ísland muni mæta Belgíu frekar en Portúgal í umspilsleiknum um sæti á HM kvenna í fótbolta.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.