Hættustigi í Meradölum aflýst

Bjarki Sigurðsson skrifar 8. september 2022 11:07

Engin virkni hefur mælst í gígunum í tæpar þrjár vikur. Vísir/Vilhelm

Hættustigi vegna eldgoss í Meradölum hefur verið aflýst sem og óvissustigi vegna jarðhræringa á Reykjanesskaga. Virkni í gígunum hefur legið niðri í tæpar þrjár vikur.

Þetta kemur fram í tilkynningu frá almannavörnum en ákvörðunin var tekin af Ríkislögreglustjóra í samráði við lögreglustjórann á Suðurnesjum.

„Enn er fylgst vel með svæðinu með tilliti til aukinnar skjálftavirkni, óróa og landbreytinga. Búast má við innskotavirkni og jarðskjálftum á Reykjanesskaga á næstu misserum og er fólk því hvatt til þess að ganga vel frá innanstokksmunum til að koma í veg fyrir líkamsmeiðsl og tjón,“ segir í tilkynningunni.

Við gosstöðvarnar starfa nú landverðir sem tóku við eftir að björgunarsveitarfólk yfirgaf svæðið fyrir helgi. Landverðir muna sinna eftirliti með umferð og umgengni fólks en lögregla og björgunarsveitir koma til með að sinna útköllum og hjálparbeiðnum.

Almannavarnir minna á að enn er varhugavert að fara út á hraunið og að gígar og eldhraun njóti sérstakrar verndar samkvæmt ákvæðum náttúruverndarlaga.

Eldgos og jarðhræringar Eldgos í Fagradalsfjalli Almannavarnir Grindavík

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.