Ungmenni létu öllum illum látum í verslunarmiðstöð

Árni Sæberg skrifar 17. ágúst 2022 06:23

Lögreglan lenti í vanda með hóp ungmenna í gær. Vísir/Vilhelm

Í gær barst lögreglu tilkynning um hóp ungmenna sem var til vandræða í verslunarmiðstöð á höfuðborgarsvæðinu. Svo fór að einn úr hópnum réðst á lögreglumann.

Óskað var eftir aðstoð lögreglu eftir að ungmennin höfðu haft í hótunum við öryggisverði verslunarmiðstöðvarinnar, sem er í umdæmi lögreglustöðvar þrjú í Kópavogi og Breiðholti, að því er segir í dagbók lögreglu fyrir gærkvöld og nóttina.

Lögregla mætti á vettvang og reyndi án árangurs að ræða við hópinn og þegar reynt var að vísa honum á dyr fór hann ekki fet. Þegar færa átti einn úr hópnum út úr verslunarmiðstöðinni réðst hann á lögreglumann.

Málið var afgreitt með aðkomu foreldra og barnaverndar.

Mikið um þjófnað

Óvenju mikið var um að lögregla væri kölluð til vegna þjófnaðar í gær. Tilkynnt var um þjófnað í símafyrirtæki þar sem tveir menn voru sagðir hafa stungið vörum í vasa sína. Mennirnir skiluðu einhverjum varningi en eru grunaðir um að hafa náð einhverjum á brott með sér. Lögregla bíður eftir upptökum úr myndavélakerfi.

Þá var tvisvar í viðbót tilkynnt um þjófnað úr verslun og lögregla hafði afskipti af tveimur mönnum vegna gruns um þjófnað. Lögregla haldlagði verkfæri sem mennirnir höfðu í fórum sínum.

Lögreglumál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.