Viðskipti innlent

Segir síðasta ár hafa verið gott fyrir álverin en þetta ár verði enn betra

Kristján Már Unnarsson skrifar
Einar Þorsteinsson er forstjóri Alcoa Fjarðaáls.
Einar Þorsteinsson er forstjóri Alcoa Fjarðaáls. Sigurjón Ólason

Rekstur áliðnaðarins hérlendis hefur aldrei gengið eins vel og nú. Þrátt fyrir að verð á áli hafi á síðustu vikum sigið niður spáir forstjóri stærsta álversins, Alcoa Fjarðaáls, því að þetta ár verði ennþá betra en það síðasta.

Í fréttum Stöðvar 2 var álver Alcoa heimsótt en það tók til starfa í Reyðarfirði árið 2007. Á þessum fimmtán ára rekstrartíma hafa verið sveiflur upp og niður. Uppsveiflan núna hefur þó aldrei verið eins há. 

„Síðasta ár í áliðnaðinum á Íslandi gekk afskaplega vel. Það gekk eiginlega svo vel að við sem erum í bransanum vorum í vandræðum með að hætta að barma okkur,“ segir Einar Þorsteinsson, forstjóri Alcoa Fjarðaáls.

Fyrstu fjóra mánuði þessa árs árs hélst verð á áli um og yfir þrjúþúsund dollurum á tonnið, sem var sögulegt met.

„Verðið fór mjög hátt, meira að segja skreið yfir fjögurþúsund dollarana. Þá fórum við að hafa miklar áhyggjur, því það getur síðan haft áhrif á heildareftirspurn eftir áli.

Og það hafði líka þau áhrif að nú er verðið komið niður í þetta sem okkur finnst kannski eðlilegt verð, í kringum 2.400-2.500 dollara tonnið.“

Frá Alcoa Fjarðaáli á Reyðafirði. Orkuverð til þess er tengt heimsmarkaðsverði á áli.Arnar Halldórsson

Þótt síðasta ár hafi fjárhagslega verið það besta segir Einar að tæknilega hafi Fjarðaál verið að glíma við erfiðleika í rekstri kerjanna.

„Það er reyndar allt að horfa til bóta og er komið bara í mjög gott lag núna.“

Því er stundum fleygt í umræðunni að gróði álveranna fari allur úr landi.

„Auðvitað fer arðurinn til eigandans. Það er bara eðli málsins samkvæmt.“

Einar segir að hellingur verði þó eftir í landinu af yfir 300 milljarða króna veltu álveranna í fyrra.

„Og af þessum 300 milljörðum urðu 125 milljarðar eftir á Íslandi. Og þar af um helmingur beint í orkufyrirtækin og flutningsfyrirtæki á orku. Yfir 20 milljarðar beint í launagreiðslur og hellingur í viðbót sem fór til birgja, verktaka og annarra, sem eru að vinna í það sem við köllum álklásanum.“

Þegar spurt er um horfurnar segist Einar hafa spáð því á aðalfundi Samáls í vor að góðærið héldi áfram í áliðnaðinum á þessu ári.

„Ég ætti von á því að þetta gæti orðið enn betra. Ég trúi því ennþá,“ segir forstjóri Alcoa Fjarðaáls.

Hér að neðan má sjá frétt Stöðvar 2


Tengdar fréttir

Miklar hækkanir á álverði skilar Norðuráli hagnaði upp á tíu milljarða

Miklar verðhækkanir á álverði á heimsmarkaði skiluðu sér í því að tekjur Norðuráls á Grundartanga jukust um 39 prósent á árinu 2021 og námu samtals 791 milljónum Bandaríkjadala, jafnvirði um 103 milljarða króna. Mikil umskipti voru í afkomu álversins sem hagnaðist um 79,4 milljónir dala eftir skatta borið saman við tap upp á tæplega 9 milljónir dala á árinu 2020.

Heimsmarkaðsverð á áli orðið ævintýralega hátt

Heimsmarkaðsverð á áli fór í gær í 3.850 dollara tonnið. Þetta er langhæsta álverð sögunnar. Álmarkaðir hafa heldur róast framan af degi og verðið sigið niður, fór niður í 3.740 dollara í morgun og var komið niður undir 3.500 dollara um hádegisbil.

Einar tekur við sem for­stjóri Alcoa Fjarðar­áls

Einar Þorsteinsson hefur verið ráðinn nýr forstjóri Alcoa Fjarðaáls og tekur við stöðunni þann 1. desember. Tor Arne Berg hefur sinnt starfinu síðastliðin tvö ár en hún snýr aftur til Noregs í nýtt starf hjá Alcoa.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.