Innlent

Þjóð­há­­tíð farin af stað í blíð­­skapar­veðri: „Svæðið sjaldan verið jafn stappað og í gær“

Vésteinn Örn Pétursson skrifar
Vestmannaeyjar skarta sínu fegursta í blíðviðrinu sem leikur þar við heimamenn og gesti.
Vestmannaeyjar skarta sínu fegursta í blíðviðrinu sem leikur þar við heimamenn og gesti. Aðsend

Húkkaraballið, sem er óformlegt upphaf Þjóðhátíðar í Vestmannaeyjum, fór nokkuð vel fram í gærkvöldi og áætlað er að aldrei hafi fleiri sótt ballið. Skipuleggjendur Einnar með öllu á Akureyri ætla ekki að láta möguleikann á vondu veðri skemma verslunarmannahelgina fyrir sér. 

Húkkaraballið er á fimmtudeginum fyrir þjóðhátíð, og markar fyrir mörgum upphaf hátíðarinnar, sem verður þó ekki sett formlega fyrr en í dag. Formaður Þjóðhátíðarnefndar segir ballið hafa farið vel fram.

„Herjólfur var þétt setinn hérna allan gærdaginn og blíðskaparveðrið mætti upp úr miðjum degi. Húkkaraballið fór bara vel fram og hefur líklega aldrei eða sjaldan verið sótt betur en í gær,“ segir Hörður Orri Grettisson, formaður þjóðhátíðarnefndar.

Og hvað voru margir sem mættu í gær? 

„Við erum ekki komin með nákvæmar tölur en miðað við þá sem þekkja til þá hefur svæðið sjaldan verið jafn stappað og það var í gær.“

Hörður Orri er formaður Þjóðhátíðarnefndar ÍBV.Stöð 2

Í tilkynningu frá lögreglunni í Vestmanneyjum kemur fram að einn hafi verið handtekinn eftir að hafa veist að lögreglumönnum. Tvö minni háttar fíkniefnamál hafi komið upp og einn hafi fengið að gista fangageymslu að eigin ósk. Að öðru leyti hafi nóttin verið róleg hjá lögreglu.

Mikil eftirvænting

Hörður segir fólk streyma til Eyja með Herjólfi og þar ríki mikil eftirvænting, enda ekki verið haldin hefðbundin þjóðhátíð í Vestmannaeyjum síðan árið 2019.

Þá kynnu einhverjir að spyrja: Er engin hætta á að fólk prjóni hreinlega yfir sig eftir tveggja ára hlé?

 „Nei, ég ætla nú að vona ekki. Fólk mætir bara og skemmtir sér og öðrum. Það er nú kannski mikilvægast í þessu, og að menn gangi hægt um gleðinnar dyr.“

Veðurspáin í Vestmannaeyjum er góð, og Hörður býst við að um 15 þúsund manns verði í Herjólfsdal á sunnudagskvöld, þegar hátíðin nær hámarki.

„Veðrið skiptir auðvitað gríðarlegu máli þegar þú ert með útihátíð í gangi. Við vonum bara að það veður haldi og í augnablikinu er stórkostlegt veður hérna,“ segir Hörður.

Íslendingar klæði sig vel

Veðurspáin á Akureyri, þar sem hátíðin Ein með öllu fer fram um helgina, er ekki jafn góð og í Vestmannaeyjum. Á morgun er spáð stífri norðvestanátt með rigningu á Norðurlandi. 

Halldór Kristinn Harðarson, skipuleggjandi hátíðarinnar, segir veðrið í bænum í dag þó með ágætu móti.

„Erum við Íslendingar ekki vanir að klæða okkur vel og hafa gaman? Mér sýnist þessar spár vera eitthvað sitt á hvað, en síðast þegar ég vissi átti laugardagurinn að vera mjög fínn og sunnudagurinn líka. Við ætlum ekkert að láta það skemma fyrir okkur ef það kemur einhver smá úði.“


Tengdar fréttir

Hlýjast á sunnan­verðu landinu í dag

Í dag verður norðlæg átt, þrír til tíu metrar á sekúndu og víða smáskúrir en rofar til suðvestan- og vestanlands. Einstaklingar á Suðaustur- og Austurlandi mega eiga von á rigningu í kvöld.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.