Miss Universe Iceland keppnin verður haldin í sjöunda sinn þann 24. ágúst í Gamla bíó. Keppendur í ár eru sautján talsins og ætla lesendur Vísis að fá að kynnast stúlkunum sem keppast um titilinn betur.
Hvað var það sem vakti áhuga þinn á keppninni?
Ég fylgdi Manúelu á Instagram og sá póstana sem hún setti inn frá síðustu keppni og það vakti áhuga minn.
Hvað ert þú búin að læra í ferlinu?
Að allir eru með sína kosti og galla en það er innri manneskjan sem skiptir máli.
Hvað borðar þú í morgunmat?
Ég byrja alltaf daginn á að fá mér Cheerios.
Hver er uppáhalds maturinn þinn?
Uppáhalds maturinn minn er heimagerð mexíkósk kjúklingasúpa sem mamma mín býr til.
Hvað ertu að hlusta á?
Ég hlusta alltaf á Fm957 á leiðinni í vinnuna en annars er ég alltaf að hlusta á TED Talks.
Hver er uppáhalds bókin þín?
It Ends with us eftir Collen Hoover
Hver er þín fyrirmynd í lífinu?
Fyrirmyndir mínar eru foreldrar mínir af því að þau gefast ekki upp á markmiðunum sínum og draumum.
Þau finna líka alltaf leiðir til að sjá það góða í hlutum.
Hver er frægasta persóna sem þú hefur hitt?
Sko, ég hef ekki hitt marga fræga einstaklinga en ég bý í sama bæjarfélagi og Guðni Th. þannig að maður kemst ekki hjá því að rekast á hann annað slagið.
Neyðarlegasta atvik sem þú hefur lent í?
Þegar að ég sat inni í herberginu mínu og heyri allt í einu karlmannsrödd segja „hæ“ og mér bregður svo mikið að ég hoppa af skrifborðsstólnum og skræki til baka einu „hæ-i“ með miklum radd-sveiflum. Þarna hitti ég í fyrsta skipti fyrsta kærasta stóru systur minnar.
Hverju ertu stoltust af?
Ég er stoltust af því hvað ég er tilbúin að takast á við nýjar áskoranir og fara út fyrir þægindarammann minn.
Hver er þinn helsti ótti?
Minn helsti ótti er það að horfa upp á háar brúnir.
Hvar sérðu þig eftir fimm ár?
Eftir fimm ár sé ég sjálfa mig í háskóla og í pólitíkinni.
Hvaða lag tekur þú í karókí?
Mér finnst alltaf gaman að taka smá Taylor Swift í karókí en mitt uppáhalds karókí lag heitir You Belong with Me.
