Innlent

Arnar Grant ber vitni í máli Vítalíu: „Ég get ekki annað og stend með sann­leikanum“

Hallgerður Kolbrún E. Jónsdóttir skrifar
Arnar Grant mun bera vitni í máli Vítalíu gegn þremenningunum.
Arnar Grant mun bera vitni í máli Vítalíu gegn þremenningunum. Vísir

Arnar Grant mun bera vitni í máli Vítalíu Lazarevu fari það fyrir dómstóla. Vítalía hefur kært Þórð Má Jóhannesson, Ara Edwald og Hreggvið Jónsson til lögreglu fyrir kynferðisofbeldi.

Arnar Grant staðfestir þetta í samtali við fréttastofu. Vítalía steig fram í hlaðvarpsþættinum Eigin konum í janúar og lýsti ofbeldi sem hún segir Þórð, Ara og Hreggvið hafa beitt sig í sumarbústaðaferð í september 2020. 

Fram kom í frásögn Vítalíu að hún hafi mætt í bústaðinn en þegar liðið hafi á kvöldið hafi verið farið yfir öll hennar mörk. 

Arnar Grant mun bera vitni í máli Vítalíu gegn þremenningunum.Vísir

Arnar segist munu bera vitni í máli Vítalíu, sem nú er á borði hjá lögreglu. Vítalía segist í samtali við fréttastofu ekki vera búin að gefa skýrslu í málinu. Arnar segist heldur ekki hafa gefið skýrslu en óvíst er með hvort Þórður, Ari og Hreggviður hafi verið boðaðir í skýrslutöku hjá lögreglu. 

„Ég er vitni í málinu. Ég sá hvað gerðist og þessar lýsingar hennar, sem hún hefur komið með, þær eru ekki fjarri lagi,“ segir Arnar í samtali við fréttastofu. 

Þannig að þú munt bera vitni í málinu fari það fyrir dómstóla?

„Já, ég mun gera það. Rétt skal vera rétt. Ég get ekki tjáð mig mikið um málið þar sem þetta er á borði lögreglu,“ segir Arnar. 

Hann segist ætla að bera vitni fyrir réttlætið og sannleikann. 

„Ég get ekkert annað og stend bara með sannleikanum.“

Sögðu af sér eða stigu til hliðar á einum degi

Mál Vítaíu komst fyrst í kastljósið í janúar eftir að viðtal Eddu Falak við hana í hlaðvarpinu Eigin konur birtist. Þar lýsti Vítalía því að hafa orðið fyrir ofbeldi af hendi þriggja eldri karlmanna í sumarbústaðarferð, sem hún hafði mætt í til að hitta þáverandi ástmann sinn, sem samkvæmt heimildum fréttastofu er einkaþjálfarinn Arnar Grant.

Í kjölfarið var greint frá því að Ari Edwald, þáverandi framkvæmdastjóri Ísey útflutnings, hefði stigið til hliðar úr stjórn fyrirtækisins. Strax sama dag steig Hreggviður Jónsson, þá stjórnarformaður og aðaleigandi Veritas Capital, úr stjórn þess og stjórnum tengdra fyrirtækja. Hreggviður sagði í yfirlýsingu sem hann sendi út að hann harmaði að hafa ekki stigið úr aðstæðunum sem Vítalía lýsti og honum þætti þungbært að heyra um hennar reynslu. Hann teldi sig þó ekki hafa gerst brotlegan við lög.

Þórður Már sagði sig samdægurs úr stjórn Festar vegna ásakananna og Arnar Grant hætti tímabundið störfum hjá World Class, þar sem hann starfaði sem einkaþjálfari í verktakavinnu.


Uppfært 29. júní: Í frétt Fréttablaðsins um málið segir að Þórður Már, Ari og Hreggviður séu með vottorð frá Ríkislögreglustjóra þess efnis að ekki sé mál á hendur þeim til rannsóknar hjá lögreglu.


Tengdar fréttir

Kauphöllin með starfslok Eggerts til skoðunar

Kauphöllin er með starfslok Eggerts Þórs Kristóferssonar forstjóra Festar til skoðunar. Staðhæfingar félagsins um að Eggert hafi sagt starfi sínu lausu virðast ekki halda vatni.

Víta­lía kærir Þórð, Ara og Hregg­við fyrir kyn­ferðis­brot

Vítalía Lazareva ætlar að kæra Þórð Má Jóhannesson, Ara Edwald og Hreggvið Jónsson til lögreglu fyrir kynferðisbrot. Hún hefur bókað tíma hjá kærumóttöku lögreglu til að leggja kæruna fram. Vítalía hefur sakað þá um að hafa beitt sig kynferðislegu ofbeldi í sumarbústaðarferð í desember 2020. 

Er stoppuð úti á götu og þakkað fyrir

Vítalía Lazareva segist fá gæsahúð þegar hún hugsar um viðbrögð þjóðarinnar við frásögn hennar af ofbeldi sem hún var beitt af fimm þjóðþekktum mönnum. 

Segir Vítalíu ekki hafa kært þre­menningana

Lögmaður Þórðar Más Jóhannessonar, eins þeirra sem Vítalía Lazareva hefur sakað um kynferðisbrot gegn sér, segir að engin kæra liggi fyrir í málinu, þvert á yfirlýsingar Vítalíu. Þeir þrír sem Vítalía sakaði um að hafa brotið gegn henni í sumarbústað í október 2020 hafa nú kært Vítalíu og Arnar Grant fyrir tilraun til fjárkúgunar. 



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.