Biðst afsökunar á að hafa beitt táragasi á stuðningsmenn Liverpool

Didier Lallement, lögreglustjóri borgarinnar þar sem úrslitaleikurinn var haldinn í ár, hefur beðist afsökunar á því sem verður að teljast alvarleg misbeiting valds af hálfu lögreglu. Lallement hefur þó varið hluta af þeim ákvörðunum sem teknar voru og sagt að þær hafi verið nauðsynlegar til að bjarga lífum.

Upphaflega kenndu frönsk yfirvöld stuðningfólki Liverpool um og sögðu það hafa mætt alltof seint á leikvanginn en leikurinn fór fram á Stade de France, þjóðarleikvangi Frakklands. Annað hefur nú komið á daginn en segja má að um skipulagsslys hafi verið að ræða.

Það afsakar ekki hegðun lögreglu þar sem fjöldi manns, þar á meðal börn, fengu meðal annars piparúða í andlit sitt ásamt því að táragasi var beitt. Til að bæta gráu ofan á svart réðust 300 til 400 ungmenni á sumt stuðningsfólk Liverpool að leik loknum.

„Þetta voru augljóslega mistök þar sem fólki var ýtt eða ráðist á það,“ sagði Lallement við franska þingið fyrr í dag, fimmtudag. Hann sagði að lögreglulið sitt hafi ekki verið nægilega vel undirbúið fyrir þau vandamál er þúsundir mættu með falsaðan miða. 

Upphaflega taldi hann að á milli 30 til 40 þúsund manns hefðu mætt með falsaða miða en eftir á sagði hann að líklega hefði fjöldinn ekki verið svo mikill

Andrew Robertson, vinstri bakvörður Liverpool, hefur staðfest að frönsk yfirvöld hafi stöðvað vini hans og sagt að miðinn væri falsaður. Miði sem Robertson sjálfur fékk í gegnum félagið. 

Lögreglustjórinn varði svo notkun táragass og sagði það hafa verið einu lausnina til að reyna dreifa mannskapnum án þess að gera atlögu að honum.

„Ég held það hefðu verið mistök að gera atlögu að hópnum og reyna dreifa þeim þannig,“ sagði Lallement og bætti við að lögregla hefði margbeðið fólk um að færa sig aftar en það hefði ekki gengið.

Að lokum sagði Lallement að hann og lögreglulið hans myndu gera allt sem í valdi þeirra stæði til að hafa hendur í hári þeirra glæpamanna sem ógnuðu og rændu stuðningsfólk Liverpool að leik loknum. 

Steve Rotherham, borgarstjóri Liverpool, var einn þeirra sem var rændur að leik loknum og mun hann veita franska þinginu vitnisburð sinn síðar í dag. Þá mun franska knattspyrnusambandið einnig leggja nokkur orð í belg.

Knattspyrnusamband Evrópu, UEFA, hefur beðið bæði félög afsökunar á atburðunum sem áttu sér stað og skipað rannsóknarnefnd vegna atburðunna. Sagði sambandið að enginn unnandi fótboltans ætti að þurfa ganga í gegnum slíkar þolraun og að svona hlutir mættu ekki gerast aftur.