Innlent

Gekk um með þráð­lausan há­talara í botni og angraði íbúa

Vésteinn Örn Pétursson skrifar
Lögregla bað manninn að lækka í tónlistinni, sem hann og gerði.
Lögregla bað manninn að lækka í tónlistinni, sem hann og gerði. Vísir/Vilhelm

Lögreglan á höfuðborgarsvæðinu hafði í morgun afskipti af ölvuðum manni í Reykjavík sem gekk um með þráðlausan hátalara og tónlist í botni. Tónlistin var svo há að hún vakti íbúa hverfisins sem maðurinn gekk um.

Þetta kemur fram í dagbók lögreglunnar um verkefni dagsins frá klukkan fimm til ellefu í morgun. Þar segir að tilkynning um manninn hafi borist frá íbúum í hverfinu sem kvörtuðu undan hávaða. Ekki fylgir sögunni um hvaða hverfi var að ræða. Maðurinn er sagður hafa lækkað í tónlistinni eftir samtal við lögreglu og haldið sína leið.

Þá brást lögregla við tilkynningu um meðvitundarlausan mann í miðbænum, en þegar hana bar að garði ásamt sjúkraliði var maðurinn farinn, að sögn þess sem hringdi málið inn.

Eins barst lögreglu tilkynning um líkamsárás fyrir utan verslun, en náði ekki að hafa uppi á árásarmanninum. Málið er til rannsóknar.

Einn ökumaður var stöðvaður í morgun grunaður um akstur undir áhrifum fíkniefna. Hann var sviptur ökuréttindum auk þess sem fíkniefni fundust í fórum hans.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×