Innlent

Ráðherra neitar að afhenda landið en borgarstjóri segist hafa afsalið

Kristján Már Unnarsson skrifar
Sigurður Ingi Jóhannsson innviðaráðherra á Reykjavíkurflugvelli í morgun eftir lendingu frá Austfjörðum.
Sigurður Ingi Jóhannsson innviðaráðherra á Reykjavíkurflugvelli í morgun eftir lendingu frá Austfjörðum. Ívar Fannar Arnarsson

Innviðaráðherra neitar borginni um að byggja í Skerjafirði og segir að hún fái ekki meira af landi Reykjavíkurflugvallar fyrr en nýr flugvallarkostur sé fundinn og uppbyggður. Borgarstjóri hafnar því að flugöryggi verði raskað og minnir á að borgin eigi landið.

Í fréttum Stöðvar 2 var fjallað um þessar nýjustu skærur í áralöngum deilum um flugvöllinn en í fréttum í gær varpaði Isavia ábyrgðinni á innviðaráðherra að taka ákvörðun um svæðið.

Svo vildi til að Sigurður Ingi Jóhannsson var að lenda á Reykjavíkurflugvelli í morgun í flugi frá Austfjörðum þar sem hann fagnaði húsnæðisuppbyggingu með sveitarstjórnarmönnum í Fjarðabyggð og Múlaþingi. Tilraunum ráðamanna Reykjavíkurborgar til húsbygginga í Skerjafirði var hins vegar ekki tekið jafn vel þegar ráðherrann steig frá borði.

„Ég verð að segja alveg eins og er að mér finnst eiginlega leiðinlegt að það þurfi að slá á puttana á meirihlutanum í Reykjavík aftur og aftur út af þessu,“ sagði Sigurður Ingi og kvaðst ætlast til að borgin virti flugvallarsamkomulagið sem gert var fyrir tveimur árum.

Flugvél Icelandair með ráðherrann um borð og Hlíðarendablokkir í baksýn. Það hverfi reis eftir átök um lokun þriðju og minnstu brautar flugvallarins. Svipaðar byggingar myndu rísa Skerjafjarðarmegin.Ívar Fannar Arnarsson

„Meðan annar kostur, jafngóður eða betri, er hvorki fundinn né uppbyggður þá felst samkomulagið í því að þessi völlur hér, sem við stöndum á, eigi að vera í óbreyttri rekstrarlegri og öryggislegri mynd. Og það er hann ekki, að mati Isavia og þeirra ráðgjafa, ef að þessar byggingar fara af stað hér í Skerjafirði.“

Það gengi því ekki að borgin fengi Skerjafjarðarlandið afhent.

„Nei, það getur ekki gerst að óbreyttu. Og ég hef ekki séð þær mótvægisaðgerðir sem hægt sé að benda á.“

-En þýðir þetta að þú munt leggjast þá gegn því að frekara land verði tekið af flugvellinum þangað til nýr flugvöllur er kominn?

„Samkomulagið sneri um það. Og eins og ég segi: Í minni sveit virða menn samkomulög,“ sagði ráðherra flugmála.

Dagur B. Eggertsson borgarstjóri.Einar Árnason

Dagur B. Eggertsson borgarstjóri segir borgina hins vegar hafa stigið öll skref í samræmi við samkomulagið og segir ótvírætt að byggingar í Skerjafirði séu ásættanlegar út frá flugöryggi.

„Þarna þarf Isavia að fara í bara ákveðið áhættumat og hugsanlega mótvægisaðgerðir. En flugöryggi er í engu raskað,“ segir Dagur.

-En Isavia segir að þessar mótvægisaðgerðir þýði að það þurfi að loka flugvellinum þegar ákveðnar aðstæður komi upp og þar með skerða rekstraröryggið?

„Það er væntanlega það sem hugsanlega kæmi út úr áhættumatinu. Það hefur ekki farið fram og það er á borði Isavia.“

Tveir forystumenn Samfylkingarinnar, Dagur B. Eggertsson, þá staðgengill borgarstjóra, og Katrín Júlíusdóttir, þáverandi fjármálaráðherra, sömdu um kaup borgarinnar á flugvallarlandi ríkisins í Skerjafirði árið 2013.Reykjavíkurborg

Dagur minnir á að borgin hafi þegar fengið landið og afsal fyrir því. En hyggst borgin þá fara í framkvæmdir á landinu í ósamkomulagi við ríkisvaldið?

„Ég hef ekki haft þann háttinn á og ég held að það þurfi heldur ekki að hafa þann háttinn á í þessu máli.

Auðvitað þurftum við að fara fyrir dóm með þriðjubrautarmálið á sínum tíma. En ég held að allir hljóti að hafa lært á því máli hvar línurnar liggja í þessu. Og geri bara ráð fyrir því að, hér eftir sem hingað til, að þá setjumst við bara niður með Isavia og ráðuneytinu varðandi þessi mál.“

-Ráðherrann virðist býsna harður og ákveðinn í málinu. Ert þú tilbúinn að fara í hart við hann?

„Ég veit ekki hvort það þurfi nokkuð að fara í hart. Því að þetta afsal var gefið út 2016,“ svarar borgarstjóri.

Hér má sjá frétt Stöðvar 2:


Tengdar fréttir

Segir borgina ekki fá Skerjafjörð, hún verði að virða samkomulag

Sigurður Ingi Jóhannsson innviðaráðherra segir að Reykjavíkurborg fái ekki flugvallarland í Skerjafirði til íbúðabygginga meðan annar jafngóður eða betri kostur undir flugvöll er ekki uppbyggður. Ráðherrann segir leiðinlegt að þurfa ítrekað að slá á puttana á borgarstjórnarmeirihlutanum en borgin verði að virða tveggja ára gamalt flugvallarsamkomulag.

Atvinnuflugmenn brýna Isavia að verja rekstraröryggi flugvallarins

Öryggisnefnd Félags íslenskra atvinnuflugmanna varar við því að nýjar húsbyggingar í Skerjafirði skapi hættu fyrir flugvélar á Reykjavíkurflugvelli með ókyrrð og sviptivindum. Isavia er hvatt til að setja fótinn niður og tryggja rekstraröryggi flugvallarins.

Segir nýja byggð í Skerjafirði atlögu gagnvart flugvellinum

Áform borgarstjórnarmeirihlutans um nýja byggð í Skerjafirði, sem kynnt verða á morgun, eru atlaga að Reykjavíkurflugvelli og skemmdarverk af stærstu gráðu, að mati Vigdísar Hauksdóttur, borgarfulltrúa Miðflokksins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.