Oddvitaáskorunin: Reyndi að hlaupa upp rúllustiga í Þýskalandi vegna misskilnings

Ásgerður Kristín Gylfadóttir leiðir lista Framsóknar á Hornafirði í komandi sveitarstjórnarkosningum.

Ásgerður er 53 ára, fædd á Ísafirði en búsett á Höfn Í Hornafirði sl. 20 ár. Ásgerður er menntaður hjúkrunarfræðingur, starfar á hjúkrunarheimilinu Skjólgarði, hefur setið í bæjarstjórn á Hornafirði frá árinu 2010 og verið varaþingmaður Framsóknar í Suðurkjördæmi frá 2016.

Síðasta kjörtímabil hefur Ásgerður verið formaður bæjarráðs auk þess að vera formaður Samtaka sunnlenskra sveitarfélaga sl. tvö ár og sitja í stjórn Sambands íslenskra sveitarfélaga.

Sjá einnig: Oddvitar um allt land sýna hina hliðina í Oddvitaáskorun Vísis

Í Sveitarfélaginu Hornafirði hefur verið mikil uppbygging síðustu ár, ferðaþjónustan stendur sterkum fótum þó heimsfaraldur Covid19 hafi óneitanlega tekið á. Vatnajökull, náttúrufegurðin og mannlíf hefur laðað kvikmynda- og sjónvarpsverkefni að sveitarfélaginu sem er góð innspýting í hagkerfið.

Hér er gott að búa, ala upp börn og eldast. Metnaður okkar í Framsókn og stuðningsmönnum þeirra er að gera enn betur til framtíðar með hagsmuni fjölskyldunnar og umhverfisins að leiðarljósi.

Hver er fallegasti staðurinn á Íslandi?

Það er erfitt að gera uppá milli fjölmargra staða í Austur- Skaftafellssýslu en Lónsöræfin eru stórkostlega falleg og kajaksigling á Heinabergslóni er engu lík.

Er eitthvað lítilvægt sem fer þó í taugarnar á þér í þínu sveitarfélagi sem þú vilt að sé lagað?

Er búin að bíða of lengi eftir uppsetningu hraðavaraskiltis í Freysnesi í Öræfum, vantar bara herslumuninn og það pirrar mig!

Hvert er þitt uppáhalds áhugamál sem gæti þótt skrítið?

Hef mikinn áhuga á flokkun endurvinnsluúrgangs, stundum vandræðalegt!

Hver eru þín minnistæðustu samskipti við lögregluna?

Ég tvítug, stoppuð fyrir ofhraðan akstur! Slapp með áminningu og gaf loforð um að keyra alltaf innan hraðatakmarkanna.

Hvað færðu þér á pizzu?

Heimagerðapizzan mín er með grænmeti, auka osti og sterku pizzakryddi.

Hvaða lag peppar þig mest?

I Will Survive – Gloria Gaynor.

Hvað getur þú tekið margar armbeygjur?

Eina í einu.

Göngutúr eða skokk?

Göngutúr er mitt skokk.

Uppáhalds brandari?

Sá sem fær mig til að hlægja hverju sinni :)

Hvað er þitt draumafríi?

Að fara með stórfjölskylduna í heimsókn til skiptinemafjölskyldunnar minnar í Sao Paulo í Brasilíu, það kemur að því.

Hvort fannst þér 2020 eða 2021 vera verra ár?

2021 var ekki mitt ár.

Uppáhalds tónlistarmaður?

Aron Martin sonur minn.

Hvað er það skrýtnasta sem þú manst eftir að hafa gert?

Kannski líka það fáránlegasta. Reynt að hlaupa upp rúllustiga í verslunarmiðstöð í Þýskalandi vegna misskilnings.

Ef það væri gerð kvikmynd um ævi þína, hver ætti að leika þig? Má vera íslenskur eða útlenskur.

Tengdadóttir mín Elísabet Skagfjörð Guðrúnardóttir er klárlega fyrsta val en ef hún er upptekin þá væri það auðvitað Marcia Cross.

Hefur þú verið í verbúð?

Já, mætti segja það. Bjó með þremur vinkonum mínum í hótelíbúð í Portúgal þar sem við unnum á hótelbar. Míní verbúð í Algarve.

Áhrifamesta kvikmyndin?

Hjartasteinn.

Áttu eftir að sakna Nágranna?

Nei, hef aldrei horft á þá þætti en á eftir að sakna Sæmundar nágranna míns sem er að flytja frá Höfn.

Ef þú yrðir að flytja úr þínu sveitarfélagi, hvert myndir þú helst vilja fara?

Já sæll, eftir mikla umhugsun...ætli ég myndi ekki elta börnin mín í Kópavog.

Uppáhalds „guilty pleasure“ lag? (skammast þín smá fyrir að hafa gaman af því – sakbitin sæla)

Skammast mín ekki fyrir neitt :)