„Þetta er eitthvað sem við erum að skoða en það hefur ekki verið tekin nein ákvörðun,“ segir Rúnar. Verksmiðjan, sem býr yfir tveimur ljósbogaofnum, var hönnuð með framtíðarstækkun í huga. Framleiðslugetan er um 32 þúsund á ári en heimilt er, samkvæmt starfsleyfinu frá Umhverfisstofnun, að framleiða 66 þúsund tonn í fjórum ljósbogaofnum.
Í ársfjórðungsskýrslu þýska félagsins PCC, sem er aðaleigandi PCC Bakka, kom fram að kísilverið skilaði hefði skilað jákvæðri rekstarafkomu í fyrra eftir „uppörvandi frammistöðu“ á síðasta ársfjórðungi.
„PCC náði að skila jákvæðri rekstrarafkomu á fjórða ársfjórðungi. Heilt yfir var verksmiðjan réttum megin við núllið á árinu 2021, að minnsta kosti hvað varðar EBITDA, og rekstrarniðurstöðurnar voru því mun betri en árið á undan og umfram væntingar okkar,“ sagði í skýrslunni.
Miklar tafir og erfiðar aðstæður á hrávörumörkuðum einkenndu rekstur kísilversins eftir gangsetningu á vormánuðum ársins 2018. Auk þess kom kórónufaraldurinn illa niður á kísilverinu á árinu 2020 – framleiðslan var stöðvuð og 80 manns sagt upp – og nam tap ársins alls 53 milljónum Bandaríkjadala, jafnvirði um 6,9 milljarða króna.
Kísilverið var endurræst í apríl í fyrra og á seinni hluta ársins naut það góðs af hækkandi verði kísilmálms.
„Framleiðsla kísilmálms í verksmiðjunni var mikil og jafnframt stöðug á fjórða ársfjórðungi. Auk þess, sökum minni útflutnings frá Kína, hélt verð á hvert tonn kísilmálms áfram að hækka í upphafi fjórðungsins og var það um tíma meira en fimm sinnum hærra en á fjórða ársfjórðungi 2020,“ sagði jafnframt í skýrslunni.
„Verðkúrfan flattist út á síðustu vikum ársins 2021 en þrátt fyrir það var verðið áfram hátt um og eftir áramót.“
Kísilverið, sem veltir nú um 2 milljörðum króna á mánuði, hefur endurráðið alla starfsmenn sem sagt var upp í kórónufaraldrinum og er starfsmannafjöldinn nú um 150 manns.
Þýska félagið á 86,5 prósent hlut í kísilverinu en Bakkastakkur, sem er fjárfestingafélag í eigu Íslandsbanka og íslenskra lífeyrissjóða, fer með 13,5 prósenta hlut.
