Tekjur Syndis, samkvæmt nýbirtum ársreikningi félagsins, námu 350 milljónum króna í fyrra og jukust um 111 milljónir frá árinu 2020. Aukningin nam því 47 prósentum milli ára. Áætlanir fyrirtækisins, sem er með á bilinu 80 til 85 prósenta markaðshlutdeild á Íslandi í tæknilegum úttektum að mati Valdimars, gera ráð fyrir 800 milljóna króna tekjum á þessu ári.
„Ef fyrirtæki, sem er ekki með samning ætlar að koma í úttekt hjá okkur þá erum við að tala um september eða október. Við erum algjörlega uppbókuð,“ segir Valdimar.
Upplýsingatæknifélagið Origo keypti Syndis í apríl í fyrra og sameinaði við sitt öryggislausnasvið. Eftir sameininguna voru starfsmenn orðnir 19 talsins en síðan þá hefur Syndis sett upp starfsstöð í Póllandi sem sinnir vöktun allan sólarhringinn og tryggir þannig betri viðbrögð við netárásum.
Valdimar segir að tekjuvöxtinn megi að miklu leyti rekja til vöktunarþjónustunnar – tvö af stærstu tölvukerfum landsins eru komin í sólarhringsvöktun hjá Syndis – og nú þegar ár er liðið frá sameiningunni hefur starfsmönnum fjölgað í 35. Kostnaður við aukin umsvif, einkum sameininguna við Origo, varð til þess að Syndis tapaði 31 milljón króna í fyrra en á árinu 2020 skilaði félagið 35 milljóna króna hagnaði.
Rússar munu ná vopnum sínum
Aukin áhætta vegna innrásar Rússa í Úkraínu er eitt af því sem knýr eftirspurn eftir sólarhringsvöktun.
„Rússar voru duglegir í netárásum fyrir stríð en eftir að það hófst byrjuðu hópar á borð við Anonymous að herja á þá og hökkuðu þá raunar í tætlur. Rússar voru komnir í bullandi vörn við að verja sín kerfi – þú spilar ekki sókn á meðan þú ert í vörn – og netárásum fækkaði frekar en hitt en við sjáum aukningu á kortlagningu veikleika, það er að fyrirtæki eru skoðuð utanfrá með því markmiði að brjótast inn síðar,“ segir Valdimar.
„En ég held að það kunni að vera lognið á undan storminum. Rússar munu ná vopnum sínum og herja á óvinalönd. Einhvern veginn þarf að fjármagna þetta stríð og það er meðal annars gert með því að brjótast inn í tölvukerfi, dulkóða gögn og heimta lausnargjald.“
Rússar munu ná vopnum sínum og herja á óvinalönd.
Á árinu 2021 var fjármálaeftirliti Seðlabanka Íslands tilkynnt um 14 netárásir sem ollu þjónusturofi hjá fjármálafyrirtækjum og í nóvember síðastliðnum var umfangsmikil netárás gerð á greiðsluþjónustu Valitor og SaltPay. Í síðasta riti fjármálastöðugleikanefndar bankans var sagt nær öruggt að ógn vegna netárása á fjármálafyrirtæki á Íslandi færi vaxandi.
Seðlabankinn greindi frá því síðasta haust að unnið væri að uppbyggingu á innlendri og óháðri smágreiðslulausn sem væri án tengingar við alþjóðlega kortainnviði. Þrjú helstu greiðslumiðlunarfyrirtæki landsins hafa verið seld erlendum fyrirtækjum á seinustu tveimur árum og hefur Seðlabankinn bent á að innlend greiðslulausn og óháð greiðslulausn gæti nýst sem varaleið ef netárásir verða gerðar á greiðslumiðlunarfyrirtæki.
