Vestmannaeyjar sem fyrr stærsta loðnuverstöðin

Kristján Már Unnarsson skrifar 31. mars 2022 11:22

Binni í Vinnslustöðinni, Sigurgeir Brynjar Kristgeirsson framkvæmdastjóri. Egill Aðalsteinsson

Einni verðmætustu loðnuvertíð Íslandssögunnar er lokið og er áætlað að afurðirnar skili um 55 milljarða króna gjaldeyristekjum. Vestmannaeyjar halda áfram stöðu sinni sem stærsta loðnuverstöð landsins.

Í fréttum Stöðvar 2 var sent beint út frá Heimaey en það voru einmitt fimm Eyjaskip sem lönduðu síðustu loðnu þessarar vertíðar í Eyjum á sunnudag. Í yfirliti um fimm stærstu loðnuhafnir landsins á vertíðinni í vetur kemur fram að Vestmannaeyjar eru hæstar, tóku við 115 þúsund tonnum eða 22 prósentum aflans, en síðan komu fjórar Austfjarðahafnir; Neskaupstaður, Vopnafjörður, Seyðisfjörður og Eskifjörður.

Fimm stærstu loðnuverstöðvar landsins á nýafstaðinni vertíð.Grafík/Ragnar Visage

Binni í Vinnslustöðinni, Sigurgeir Brynjar Kristgeirsson, var spurður hvað stæði upp úr á vertíðinni í ár:

„Þetta var ofboðslega erfið vertíð til sjávarins vegna bara mikilla stórviðra.“

-En samt, einhver sú verðmætasta í sögunni.

„Já, ég hugsa að hún sé ein sú verðmætasta, ein af þeim sem skipti mestu máli. Hún náttúrlega kemur í kjölfar tveggja „ekki vertíða“ ef ég má segja sem svo, það voru tvær vertíðar í röð. Og svo var lítil vertíð í fyrra."

Séð yfir Vestmannaeyjahöfn í gær. Öll sjö loðnuskip Eyjamanna voru í höfn.Egill Aðalsteinsson

„Og svo kemur þessi stóra vertíð núna, sem var auðvitað vel þegin. En við hefðum gjarnan viljað ná öllum kvótanum.

Ég held að allt sem við í mannlegu valdi réðum við, það gerðum við vel. Og auðvitað þökkum við það okkar sjómönnum og starfsfólki fyrir það. Fyrir frábær störf,“ segir Binni.

Samkvæmt tölum Fiskistofu veiddu íslensku skipin 521 þúsund tonn. Endanlegur kvóti þeirra var hins vegar 686 þúsund tonn. Því eru óveidd 165 þúsund tonn.

Alls voru 22 skip gerð út til loðnuveiða á vertíðinni í ár. Á lista yfir fimm aflahæstu skipin kemur fram að Börkur NK trónir á toppnum, veiddi nærri 38 þúsund tonn, en síðan koma Vilhelm Þorsteinsson, Beitir, Venus og Heimaey VE.

Fimm aflahæstu skipin á vertíðinni. Síldarvinnslan í Neskaupstað gerir út Börk og Beiti, sem eru í fyrsta og þriðja sæti. Samherji gerir úr Vilhelm Þorsteinsson, Brim gerir úr Venus og Ísfélag Vestmannaeyja gerir út Heimaey.Grafík/Ragnar Visage

Sjö loðnuskip, eða nærri þriðjungur loðnuflotans, eru gerð út frá Eyjum og þau eru öll núna í höfn. Magnús Jónasson, skipstjóri á Ísleifi, segir einnig að illviðrin hafi staðið upp úr.

„Þetta var bara afleitt veðurfar, sem leiddi eitt af öðru. Gangan kom kannski öðruvísi upp að landinu og loðnan, hún tekur mark á því hvernig veðrið er.

En við erum sáttir miðað við hvernig spilaðist úr veðrinu.“

Magnús Jónasson, skipstjóri á Ísleifi VE.Egill Aðalsteinsson

-En þið urðuð dálítið varir við hvali, heyri ég.

„Jú, það er búið að vera óhemju mikið af hval. Ég byrjaði á þessum veiðiskap 1979. Þá var hrópað niður í borðsal: Hvalur! Hann sást kannski einu sinni í viku.

En nú er bara blástur við blástur. Þannig að þetta er harður keppinautur,“ segir skipstjórinn á Ísleifi VE.

Mönnum reiknast til að loðnuvertíðin í ár skili þjóðarbúinu alls um 55 milljarða króna útflutningstekjum. 22 prósenta hlutur Vestmannaeyja þýðir þá tólf milljarða króna, sem er ekkert smáræði fyrir svona samfélag á þriggja mánaða vertíð.

Hér má sjá frétt Stöðvar 2:

Loðnuveiðar Vestmannaeyjar Sjávarútvegur Veður Efnahagsmál Fjarðabyggð Vopnafjörður Múlaþing

Tengdar fréttir

Loðnukvótinn aukinn á sama tíma og verðmætasta veiðin er hafin

Íslenskar loðnuútgerðir fá um fimmtíu þúsund tonna viðbótarkvóta í loðnu þar sem Norðmönnum tókst ekki að klára sinn kvóta áður en veiðitímabili þeirra á Íslandsmiðum lauk. Þetta gerist á sama tíma og verðmætasti þáttur loðnuvertíðarinnar, hrognavinnslan, er að hefjast.

3. mars 2022 23:30

Hundfúlir að þurfa að hætta í mokveiði á loðnumiðunum

Loðnuskipin streyma núna í höfn, hvert af öðru, eftir að Hafrannsóknastofnun varaði við yfirvofandi kvótaskerðingu. Skipstjórinn á Venusi segir að menn verði bara að taka þessu en viðurkennir að þeir séu hundfúlir.

3. febrúar 2022 22:22

Gerir hlé á loðnuveiðum vegna viðvörunar um kvótaskerðingu

Ný mæling á loðnustofninum, sem kynnt var síðdegis, bendir til að skerða þurfi loðnukvótann á yfirstandandi vertíð um eitthundrað þúsund tonn, eða um ellefu prósent. Þetta gæti þýtt fjögurra milljarða króna minni tekjur þjóðarbúsins en áður var vænst. Vinnslustöðin brást strax við með því að láta skip sín hætta veiðum.

2. febrúar 2022 21:21

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir