Atvinnulíf

Að vera kvíðin yfir því að verða kvíðin

Rakel Sveinsdóttir skrifar
Eitt af því sem getur magnað upp kvíðatilfinningu hjá okkur eru fréttir. Til dæmis eins og nú þegar stríðsfréttir dynja yfir okkur. Ef við erum oft kvíðin, getum við endað með að kvíða fyrir að verða kvíðin. Sem truflar okkur í einkalífi og starfi. Við eigum til dæmis erfiðara með einbeitingu, afköst, skipulag og samskipti.
Eitt af því sem getur magnað upp kvíðatilfinningu hjá okkur eru fréttir. Til dæmis eins og nú þegar stríðsfréttir dynja yfir okkur. Ef við erum oft kvíðin, getum við endað með að kvíða fyrir að verða kvíðin. Sem truflar okkur í einkalífi og starfi. Við eigum til dæmis erfiðara með einbeitingu, afköst, skipulag og samskipti. Vísir/Getty

Við erum alla daga að kljást við að vera okkar besta útgáfa. Það er alltaf draumurinn: Að líða vel, vera kát, ganga vel í vinnu og einkalífi. Hljómar kannski auðvelt en svo margt í dagsins amstri getur verið streituvaldandi.

Stríðsfréttir eins og nú dynja yfir eru dæmi um eitthvað sem við getum orðið kvíðin yfir. Er að brjótast út stríð í Evrópu? 

Í vinnunni kíkjum við á fréttir mun oftar yfir daginn og þótt við gerum það ekki, eru allar líkur á að einhver sem við tölum við í vinnunni, fari að tala um ástandið í Úkraníu.

Að reyna að stressast ekki eða fá áhyggjur, getur verið áskorun út af fyrir sig.

Sem tekur frá okkur orku.

Ekki síst á þessum tíma þar sem við erum rétt að sjá til sólar eftir tveggja ára viðvarandi streitutímabil vegna kórónuveiru og sóttvarna.

Þar sem margir hafa farið í gegnum róttækar breytingar. Til dæmis misst starfið sitt og byrjað á nýjum vinnustað. Jafnvel á allt öðrum vettvangi en áður.

Allt ofangreint getur leitt til þess að kvíðahnúturinn í maganum verður að eins og vana. 

Já, við erum hreinlega farin að vera kvíðin yfir því að verða kvíðin.

Og það að vera kvíðin er eitthvað sem gerir okkur erfiðara fyrir í öllu. Við náum til dæmis ekki sömu einbeitingunni í vinnunni né sömu afköstunum og við annars gætum náð. Við erum ekki eins góð í samskiptum og við gætum almennt verið.

Verkefnalistarnir okkar eru þar með líklegri til að virðast þyngri og jafnvel óyfirstíganlegri. Við verðum síður góð í að skipuleggja okkur vel eða forgangsraða rétt. 

Kvíði getur þannig verið eins og snjóbolti sem rúllar...

En hér eru nokkur ráð sem geta hjálpað.

Að leita hjálpar eða tala við vin/vinnufélaga

Við getum verið stödd á mismunandi stað þegar að við erum kvíðin en aðalmálið er að ef þér finnst þú ekki ráða við aðstæður eða treystir þér ekki til að sporna við kvíða, er gott fyrsta skref að ræða við lækni eða sálfræðing.

Því það að vera alltaf kvíðin eða jafnvel að kvíða fyrir því að verða kvíðin, er líðan sem gerir okkur erfitt fyrir í einkalífi og starfi.

Ef við treystum okkur til að takast á við kvíðann, getur samt verið gott að ræða við vin. Þessi vinur getur verið maki, vinur/vinkona eða samstarfsfélagi. Mörgum kemur það á óvart hversu margir samsvara sig við að upplifa kvíða þegar fólk fer að tala saman.

Öndunaræfingar eða hugleiðsla

Hugleiðsla er mjög róandi fyrirbæri og á Youtube er hægt að finna ógrynni af hugleiðslum sem hjálpa fólki við að ná innri ró.

Margar hugleiðslur eru hins vegar á ensku og henta því ekki öllum. Eins upplifir fólk oft að því vanti tækni til að hjálpa sér án þess að það taki of langan tíma.

Eins og til dæmis í vinnunni.

Þá er gott að grípa í öndunaræfingar. Að einbeita sér að önduninni í nokkrar mínútur er mjög einfalt og róandi. Á vinnustaðnum getum við jafnvel gert þetta inni á salerni þar sem enginn sér.

En vittu til: Þetta hjálpar.

Að sofa nóg og sofa vel

Að sofa í sjö til átta klukkustundir á nóttu getur gert gæfumuninn. Allt verður einhvern veginn auðveldara viðfangs, bæði í einkalífi og starfi.

Á netinu er hægt að finna fullt af góðum ráðum um það, hvernig við getum bætt svefninn okkar. Eins er hægt að leita til svefnráðgjafa eða ræða um svefninn við lækni ef þú telur þig þurfa hjálp til að ná tökum á góðum svefni.

Hreyfing á þínum mælikvarða

Það eru ekkert allir fyrir það að stunda líkamsrækt eða íþróttir. En það er ekki þar með sagt að ekki sé hægt að finna út úr því, hvernig við aukum á hreyfingu.

Allt telur. Það að standa oftar upp í vinnunni. Ganga rösklega í heimilisverkin og líta á það að vaska upp og setja í þvottavél sem hluta af hreyfingu.

Að fara í göngutúr.

Að leggja bílnum lengra frá búðinni eða vinnustaðnum.

Hver og einn getur reynt að auka við hreyfingu miðað við það mynstur sem er hjá hverjum og einum. Og oft leiðir þetta til þess að áhuginn á því að auka enn meira við hreyfingu eykst.

Matarræði og vatn

Hér gilda engin boð né bönn en rannsóknir hafa sýnt að góð næring og jafn blóðsykur yfir daginn, dregur úr líkunum á því að við séum kvíðin.

Gott er að taka lítil skref því þau geta gert kraftaverk. Ef þú til dæmis setur þér það markmið að drekka 1,5-2 lítra af vatni á dag getur þetta eitt og sér dregið úr kvíða því hugurinn verður upptekin af því að sinna þessu markmiði og fyrir vikið víkur oft kvíði yfir einhverju öðru, til dæmis fréttum.

Ýmiss önnur slökun

Það eru alls kyns slökunarmöguleikar sem hægt er að horfa til. Heitt bað eða góð sturta. Lestur góðrar bókar. Nudd. Jóga. Koffínlaust grænt te.

Í vinnunni er mikilvægt að passa að taka sér hvíldarpásur yfir daginn. Borða með vinnufélögum og tala um eitthvað annað en fréttir eða vinnuna.

Við afköstum meira í vinnunni ef við tökum okkur hlé á milli verkefna og leyfum huganum að hvílast í smá stund.

Þá getur ýmislegt á andlegum nótum hjálpað mikið. Að trúa á eitthvað getur því hjálpað, óháð því hvort fólk leitar þá í trúarbrögð og bænir eða jákvæða orku og alheiminn.

Því öll mál leysast á endanum og engin vandamál eða staða er endanleg. Allt sem getur hjálpað okkur til að sporna við kvíða er því vel þess virði að huga að.


Tengdar fréttir

Þurfum að þjálfa og styrkja tilfinningavöðvann okkar

Tilfinningaviðbrögðin okkar eru ekki hönnuð fyrir nútímann og þess vegna erum við oftar í dag að upplifa líðan eins og kvíða, depurð, áhyggjur, þunglyndi, svefnleysi og fleira. En við getum þjálfað okkur í andlegri heilsu, rétt eins og þeirri líkamlegu.

„Það er í lagi að segja ekki alltaf allt gott“

Í stað þess að segjast alltaf segja allt gott og þykjast vera hress, þurfum við mögulega að læra að segja satt og viðurkenna að okkur líður ekkert alltaf vel. Líka í vinnunni.

Mikilvægt fyrir okkur öll að gera stundum ekkert

Það kann að hljóma undarlega en það er mikilvægt fyrir okkur öll að gera stundum ekki neitt. Já, við erum að tala um að iðjuleysi er eitthvað sem gerir okkur gott. En hvernig getur það mögulega verið og hvaða árangur upplifum við af iðjuleysi?





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×