Sport

For­seti IOC hneykslast á hversu kulda­lega þjálfarar Kamilu komu fram við hana

Óskar Ófeigur Jónsson skrifar
 Eteri Tutberidze tók á endanum utan um Kamilu Valievu en hafði áður skammað hana.
 Eteri Tutberidze tók á endanum utan um Kamilu Valievu en hafði áður skammað hana. AP/David J. Phillip

Skautakonan Kamila Valieva er aðeins fimmtán ára gömul og var að keppa á Ólympíuleikunum með allan heiminn á herðum sér. Hún hélt ekki út og klúðraði síðustu æfingu sinni. Viðbrögð þjálfara hennar kölluðu á gagnrýni frá sjálfum forseta Alþjóðaólympíunefndarinnar.

Það eru allir að pæla í skautadrottningunni ungu sem féll á lyfjaprófi í desember en fékk samt að keppa á Vetrarólympíuleikunum í Peking. Það efast enginn um hæfileika hennar en um leið bendir allt til þess að Rússar hafi gefið þessari fimmtán ára stelpu kokteil af hjartalyfjum til að auka getu hennar til æfinga.

Svo mikil er athyglin á Kamilu að Thomas Bach, forseti Alþjóðaólympíunefndarinnar, sá ástæðu til að segja sína skoðun á hvernig komið var fram við þessa ungu íþróttakonu sem á enn fimm ár eftir í tvítugsafmælið sitt.

Bach sagði að það hafi verið hrollvekjandi að fylgjast með hversu kuldalega þjálfarar Kamilu komu fram við hana eftir að hún hafði augljóslega gert of mörg mistök í lokaæfingu sinni. Kamila endaði í fjórða sætinu eftir að hafa verið efst eftir skylduæfingarnar.

Frammistaða Kamilu í lokaæfingunni er enn eitt dæmið um að hún átti aldrei að vera inn á ísnum enda að keppa við aðstæður sem áttu aldrei að vera leyfðar.

Það var samt ekkert faðmlag eða huggun fyrir hina fimmtán ára gömlu Kamilu sem var augljóslega niðurbrotin. Í stað þess að hughreysta hana þá hreytti Eteri Tutberidze þjálfari í hana: Af hverju hættir þú að berjast?

„Þegar ég sá það hvernig var komið fram við hana af hennar nánasta samstarfsfólki, sem litu út fyrir að vera ferlega kuldalegar móttökur, þá fékk ég hroll. Að taka svona á móti henni í stað þess að hughreysta hana eða reyna að hjálpa henni,“ sagði Thomas Bach.

Bach sagðist enn fremur haga verið mjög brugðið þegar hann fylgdist með keppninni í sjónvarpinu.

„Allt þetta gefur mér ekki mikla trú á þessu nánasta liði Kamilu, hvorki með það sem gerðist í fortíðinni eða hvað mun gerast í framtíðinni. Hvernig var komið fram við íþróttamann sem er aðeins fimmtán ára og að eiga við augljóslega mikið andlegt álag,“ sagði Bach.


Tengdar fréttir

Illgjarnt fólk sem láti börn dópa eigi heima í fangelsi

Á meðal þeirra sem gagnrýnt hafa þá staðreynd að hin 15 ára gamla Kamila Valieva megi keppa á Vetrarólympíuleikunum er forseti alþjóða lyfjaeftirlitsins (WADA), Witold Banka, sem segir að fólk sem láti börn neyta ólöglegra, árangursaukandi lyfja eigi heima í fangelsi.

„Eini munurinn sem ég sé er að ég er svört, ung dama“

Bandaríska spretthlaupskonan Sha‘Carri Richardson gagnrýnir harðlega þá niðurstöðu alþjóða ólympíunefndarinnar að skautakonan Kamila Valieva megi keppa á Vetrarólympíuleikunum. Richardson var meinuð þátttaka á Sumarólympíuleikunum í fyrra.




Fleiri fréttir

Sjá meira


×