Sektar sex verslanir í Eyjum vegna trassaskaps við verðmerkingar

Atli Ísleifsson skrifar 9. febrúar 2022 08:10

Starfsmaður Neytendastofu heimsótti verslanir í Vestmannaeyjum með tveggja mánaða millibili, í september og aftur í nóvember síðastliðinn, og kannaði þar stöðu verðmerkinga. Vísir/Vilhelm

Neytendastofa hefur sektað sex verslanir í Vestmannaeyjum þar sem þær hafi ekki sinnt reglum um verðmerkingar. Verslanirnar sem um ræðir eru Flamingó, Heimaey, N1 Friðarhöfn, Póley, Salka og Tvisturinn og nema sektirnar ýmist 50 eða 100 þúsund krónur.

Á vef Neytendastofu segir að í verðmerkingareftirliti sé skoðað hvort söluvörur séu verðmerktar, hvar sem þær séu sýnilegar eða aðgengilegar neytendum. Einnig sé skoðað hvort að verðskrá yfir framboðna þjónustu sé sýnileg.

„Í verðmerkingareftirliti Neytendastofu gerðu starfsmenn stofnunarinnar athugasemdir við verðmerkingar í verslununum þar sem ástand verðmerkinga var ábótavant og hvatti stofnunin til úrbóta. Þegar starfsmenn Neytendastofu komu í annað sinn voru enn gerðar athugasemdir við verðmerkingar og því hefur stofnunin nú sektað fyrirtækin,“ segir í tilkynningunni, en heimsóknirnar áttu sér stað í september og nóvember á síðasta ári.

Sektirnar sem verslanirnar fengu voru:

Flamingó: 50 þúsund krónur
Heimaey: 50 þúsund krónur
N1 Friðarhöfn: 100 þúsund krónur
Póley: 50 þúsund krónur
Salka: 50 þúsund krónur
Tvisturinn: 100 þúsund krónur

Verslanirnar eiga að greiða sektina innan þriggja mánaða.

Neytendur Vestmannaeyjar Verslun

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.