Körfubolti

Klay Thompson lék í nótt sinn fyrsta leik í NBA-deildinni í 941 dag

Óskar Ófeigur Jónsson skrifar
Klay Thompson fagnar körfu í sigri Golden State Warriors á Cleveland Cavaliers í nótt.
Klay Thompson fagnar körfu í sigri Golden State Warriors á Cleveland Cavaliers í nótt. AP/John Hefti

Stóra frétt næturinnar í NBA-deildinni í körfubolta var endurkoma Klay Thompson í lið Golden State Warriors eftir meira en tveggja tímabila fjarveru vegna meiðsla. Klay skilaði fínum tölum í sigri.

Klay Thompson skoraði 17 stig á 20 mínútum í 96-82 sigri Golden State Warriors á Cleveland Cavaliers en Golden State hafði tapað tveimur síðustu leikjum sínum.

Klay hefur slitið krossband og hásin á síðustu tveimur árum og það var liðinn 31 mánuður frá hans síðasta leik sem var í lokaúrslitum um NBA-titilinn þar sem krossbandið fór.

Klay hitti úr 7 af 18 skotum sínum í leiknum þar af af 3 af 8 fyrir utan þriggja stiga línuna. Hápunkturinn var án efa þegar hann tróð yfir tvo leikmenn Cleveland liðsins.

Stephen Curry var stigahæstur hjá Golden State með 29 stig stig auk fimm frákasta og fimm stoðsendingar. Jordan Poole skoraði 14 stig en Warriors jafnaði árangur Phoenix Suns sem besta lið deildarinnar en bæði eru nú með 30 sigra og 9 töp.

LeBron James átti enn einn stórleikinn með Los Angeles Lakers en það dugði þó ekki í fimmta sigurleikinn í röð. Lakers tapaði 119-127 á móti Memphis Grizzlies þrátt fyrir 35 stig, 9 fráköst og 7 stoðsendingar.

Þetta var áttundi sigurleikur Memphis Grizzlies í röð. Einn af þeim sigrum var sigur liðsins á Lakers 30. desember sem þýðir að tveir síðustu tapleikur LeBron og félaga í Lakers hafa verið á móti Memphis.

Desmond Bane skoraði 23 stig fyrir Memphis, Jaren Jackson Jr. var með 21 stig og 12 fráköst og Ja Morant skoraði 16 stig.

Enginn annar í byrjunarliði Lakers skoraði meira en sjö stig en Russell Westbrook var með 6 stig, 7 fráköst og 6 stoðsendingar. Wayne Ellington og Austin Reaves voru næststigahæstir með 16 stig hvor.

Luka Doncic var með þrefalda tvennu, 22 sitg, 14 fráköst og 14 stoðsendingar, þegar Dallas Mavericks vann 113-99 sigur á Chicago Bulls og endaði þar með níu leikja sigurgöngu Bulls liðsins. Dallas hefur nú unnið sex leiki í röð.

DeMar DeRozan og Zach LaVine skoruðu báðir 20 stig fyrir Chicago Bulls liðið en þetta var fyrsti tapleikur liðsins síðan liðið tapaði á móti Miami Heat 12. desember síðastliðinn.

Nýliðinn Cam Thomas tryggði Brooklyn Nets 121-119 sigur á San Antonio Spurs í framlengdum leik en þetta var fyrsti sigur Brooklyn á heimavelli síðan 16. desember. Bestu menn liðsins voru þó Kevin Durant (28 stig, 6 stoðsendingar) og James Harden (26 stig, 12 stoðsendingar, 7 fráköst).

  • Úrslitin í NBA-deildinni í nótt:
  • Golden State Warriors - Cleveland Cavaliers 96-82
  • Los Angeles Lakers - Memphis Grizzlies 119-127
  • Brooklyn Nets - San Antonio Spurs 121-119 (framlengt)
  • Los Angeles Clippers - Atlanta Hawks 106-93
  • Toronto Raptors - New Orleans Pelicans 105-101
  • Orlando Magic - Washington Wizards 100-102
  • Houston Rockets - Minnesota Timberwolves 123-141
  • Oklahoma City Thunder - Denver Nuggets 95-99
  • Dallas Mavericks - Chicago Bulls 113-99
  • Portland Trail Blazers - Sacramento Kings 103-88
NBA



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.