Handbolti

Ómar Ingi íþróttamaður ársins

Sindri Sverrisson og Atli Arason skrifa
Þrjú efstu í kjörinu á íþróttamanni ársins árið 2021: Kolbrún Þöll Þorradóttir, Ómar Ingi Magnússon og Kristín Þórhallsdóttir.
Þrjú efstu í kjörinu á íþróttamanni ársins árið 2021: Kolbrún Þöll Þorradóttir, Ómar Ingi Magnússon og Kristín Þórhallsdóttir. Mummi Lú

Selfyssingurinn Ómar Ingi Magnússon er íþróttamaður ársins 2021. Hann varð efstur í kjöri Samtaka íþróttafréttamanna en litlu munaði á tveimur efstu íþróttamönnunum í ár.

Fimleikakonan Kolbrún Þöll Þorradóttir varð í 2. sæti og kraftlyftingakonan Kristín Þórhallsdóttir í 3. sæti en alls fengu 25 íþróttamenn atkvæði í kjörinu í ár.

Ómar Ingi, sem er á leið á EM í næsta mánuði, er 24 ára gamall og leikur með efsta liði bestu landsdeildar Evrópu í handbolta, þeirrar þýsku. 

Hann varð markakóngur efstu deildar Þýskalands í vor og þá var hann jafnframt valinn í lið ársins í Þýskalandi. Ómar hefur áfram verið afar mikilvægur fyrir Magdeburg í haust og er meðal markahæstu og stoðsendingahæstu manna þýsku deildarinnar en Magdeburg trónir sem stendur á toppnum. 

Þá vann Ómar Evrópudeildina með Magdeburg sem einnig varð heimsmeistari félagsliða eftir sigur á Barcelona í úrslitaleik.

Topp tíu í kjörinu um Íþróttamann ársins 2021. F.v. Sveindís Jane Jónsdóttir, Kári Árnason, Kolbrún Þöll Þorradóttir, Bjarki Már Elísson, Júlían J.K. Jóhannsson, Ómar Ingi Magnússon, Kristín Þórhallsdóttir og Rut Arnfjörð Jónsdóttir. Á myndina vantar Aron Pálmarsson og Martin Hermannsson.MummiLú

Íþróttamaður ársins 2021 – stigin

  1. Ómar Ingi Magnússon, handbolti 445
  2. Kolbrún Þöll Þorradóttir, fimleikar 387
  3. Kristín Þórhallsdóttir, kraftlyftingar 194
  4. Martin Hermannsson, körfubolti 150
  5. Aron Pálmarsson, handbolti 143
  6. Júlían J. K. Jóhannsson, kraftlyftingar 122
  7. Sveindís Jane Jónsdóttir, fótbolti 114
  8. Bjarki Már Elísson, handbolti 109
  9. Rut Arnfjörð Jónsdóttir, handbolti 93
  10. Kári Árnason, fótbolti 85
  11. Elvar Már Friðriksson, körfubolti 48
  12. Aldís Kara Bergsdóttir, skautar 40
  13. Hlynur Andrésson, frjálsíþróttir 32
  14. Ásta Kristinsdóttir, fimleikar 31
  15. Glódís Perla Viggósdóttir, fótbolti 26
  16. Helgi Laxdal Aðalgeirsson, fimleikar 24
  17. Haraldur Franklín Magnús, golf 22
  18. Guðrún Brá Björgvinsdóttir, golf 13
  19. Erna Sóley Gunnarsdóttir, frjálsíþróttir 10
  20. Már Gunnarsson, íþróttir fatlaðra 8
  21. Helena Sverrisdóttir, körfubolti 7
  22. Alfons Sampsted, fótbolti 6
  23. Baldvin Þór Magnússon , frjálsíþróttir 6
  24.  Anton Sveinn McKee, sund 1
  25. Róbert Ísak Jónsson, íþróttir fatlaðra 1

Í 2. sæti í kjörinu varð Kolbrún Þöll Þorradóttir sem gegndi lykilhlutverki í Evrópumeistaraliði Íslands í hópfimleikum í Portúgal fyrir mánuði síðan.

Kolbrún Þöll var valin í úrvalslið EM, í fjórða sinn á ferlinum. Í þetta sinn var Kolbrún valin í úrvalsliðið vegna árangurs á trampólíni en þar framkvæmdi hún eitt erfiðasta stökk mótsins. Þá varð hún einnig Íslands- og bikarmeistari með Stjörnunni.

Sex fengu atkvæði í efsta sæti

Kraftlyftingakonan Kristín Þórhallsdóttir varð í 3. sæti. Hún skaust fram á sjónarsviðið í ár og setti Evrópumet og varð Evrópumeistari í -84 kílóa flokki í klassískum kraftlyftingum. Kristín lyfti 560 kílóum samanlagt, sem er nýtt Evrópumet. Hún er fyrsti Íslendingurinn til að fagna Evrópumeistaratitli í samanlögðu. Þá vann hún brons á HM í klassískum kraftlyftingum í október.

Alls tóku 29 íþróttafréttamenn þátt í kjörinu í ár og raðaði hver um sig íþróttafólki á sinn lista í sæti 1-10. Fyrir 1. sæti fengust 20 stig, fyrir 2. sæti fengust 15 og fyrir 3. sæti 10. Fjórða sætið gaf 7 stig, 5. sætið 6 stig og svo koll af kolli.

Ómar Ingi fékk því 445 af 580 stigum mögulegum en alls fengu sex íþróttamenn atkvæði í efsta sæti í ár.

Íþróttamaður ársins Þýski handboltinn

Mest lesið


Fleiri fréttir

Sjá meira


×

Mest lesið