Dökkt yfir herbúðum LeBrons eftir þriðja tap Lakers liðsins í röð

Phoenix Suns vann 108-90 sigur á Los Angeles Lakers á heimavelli Lakers og það þarf eitthvað að fara breytast ætli liðið hreinlega að vera með í úrslitakeppninni í ár. Fjarvera Anthony Davis vegna meiðsla er ekki mikið að hjálpa til en hann verður ekki með næstu vikurnar.

Lakers var einu stigi yfir eftir fyrsta leikhlutann og það munaði aðeins tveimur stigum á liðunum í hálfleik. Phoenix vann aftur á móti seinni hálfleikinn með 16 stigum. Suns var meira yfir en varamenn Lakers löguðu stöðuna aðeins í lokin.

Devin Booker átti mjög góðan leik og var með 24 stig, 9 fráköst og 7 stoðsendingar en Deandre Ayton skoraði 19 stig og tók 11 fráköst. Chris Paul var með 11 stig og 9 stoðsendingar. Þetta var fjórði sigur Phoenix Suns í röð en liðið er með besta sigurhlutfallið í deildinni, 25 sigra í 30 leikjum.

LeBron James reyndi hvað hann gat og var með 34 stig. Hann gaf hins vegar aðeins tvær stoðsendingar og slæm skotnýting liðsfélaga hans hafði örugglega mikið um það að segja. Leikar stóðu jafnir þær 34 mínútur sem James spilaði í leiknum.

Byrjunarliðsmaðurinn Talen Horton-Tucker klikkaði þannig á 12 af 13 skotum sínum í leiknum, nýi maðurinn Isiah Thomas var 1 af 11 í skotum utan af velli og aðeins 2 af 7 skotum Carmelo Anthony rötuðu rétta leið. Lakers liðið tapaði síðan með 26 stigum þegar 19 mínútur sem Rajon Rondo spilaði.

Russell Westbrook var með 22 stig, 10 fráköst og 5 stoðsendingar og Trevor Ariza hitti úr öllum þremur þriggja stiga skotum sínum en hann endaði með 12 stig.

Damian Lillard skoraði 39 stig fyrir Portland Trail Blazers en það dugði ekki því liðið taðaði 111-97 á móti New Orleans Pelicans. Lillard var síðan rekinn út úr húsi í fyrsta sinn á ferlinum þegar aðeins 1,1 sekúnda var eftir af leiknum.

Brandon Ingram skoraði 28 stig fyrir Pelíkanana og Nickeil Alexander-Walker var með 22 af 27 stigum sínum í seinni hálfleik en þetta var í fyrsta sinn á tímabilinu þar sem liðið nær að vinna þrjá leiki í röð. Liðið er enn án Zion Williamson en vann engu að síður í áttunda sinn í síðustu þrettán leikjum.

Tyler Herro kom til baka eftir þriggja leikja fjarveru og skoraði 26 stig í 125-96 sigri Miami Heat á Indiana Pacers. Duncan Robinson var einnig með 26 stig og Miami jafnaði félagsmetið sitt með 22 þristum. Þessir tveir voru með ellefu saman og það úr aðeins átján tilraunum.

Evan Fournier skoraði 22 stig og þeir Julius Randle og Kemba Walker voru báðir með 21 stig í fyrsta heimasigri New York Knicks í næstum því heilan mánuð en liðið van þá 105-91 sigur á Detroit Pistons. Þetta var fyrsti sigur liðsins í Madison Square Garden síðan liðið vann Lakers 23, nóvember síðastliðinn.