Innlent

Heyrir til tíðinda að enginn við­vörunar­borði sé á vef Veður­stofunnar

Sunna Karen Sigurþórsdóttir skrifar
Engir rauðir borðar blasa við landsmönnum á vef Veðurstofunnar,  sem sætir nokkrum tíðindum enda er það í fyrsta sinn í rúmt ár sem Veðurstofan varar ekki við óveðri eða náttúruvá. 
Engir rauðir borðar blasa við landsmönnum á vef Veðurstofunnar,  sem sætir nokkrum tíðindum enda er það í fyrsta sinn í rúmt ár sem Veðurstofan varar ekki við óveðri eða náttúruvá.  Vísir/Vilhelm

Enginn viðvörunarborði vegna óvissustigs eða veðurviðvarana er á vef Veðurstofunnar, í fyrsta sinn í rúmt ár, eftir að óvissustigi var aflétt á Seyðisfirði og hætti að gjósa í Geldingadölum. Elín Björk Jónasdóttir veðurfræðingur segir það heyra til tíðinda að engar viðvaranir séu uppi. 

„Þetta er búið að vera viðvarandi núna allt þetta ár má segja vegna náttúruvár, þannig að það sætir aðeins tíðindum að það sé enginn borði á vef Veðurstofunnar núna,” segir Elín.

Óvissustig hefur verið viðvarandi á landinu öllu síðan 15. desember í fyrra, eða þegar því var lýst yfir vegna skriðufalla á Seyðisfirði. Ýmsar aðrar náttúruvár hafa látið á sér kræla síðan þá; hvort sem er vegna skriðu- eða snjóflóðahættu, jökulhlaups eða jarðhræringa, en óvissustigi vegna jarðhræringa var lýst yfir í byrjun árs. 

Sem kunnugt er hófst eldgos í framhaldinu sem stóð yfir í sex mánuði. Óvissustigi vegna eldgossins var aflétt í byrjun mánaðar og sömuleiðis var því aflétt á Seyðisfirði nú á miðnætti.

Elín Björk Jónasdóttir veðurfræðingur.Vísir/Sigurjón

„Það voru engar rauðar veðurviðvaranir í ár, allavega ekki enn sem komið er, en það var viðloðandi náttúruvá. Síðasti borðinn á vef Veðurstofunnar var óvissustig vegna náttúruvár en því var aflétt á miðnætti, og síðan var eldgos í næstum sex mánuði sem líka var varað við. En veðurviðvaranir koma og fara, þær eru miklu kvikari, og eru kannski bara í einn til tvo daga í senn, en það hefur ekki verið neitt óvenju mikið af þeim í ár,” segir Elín.

Þá má búast við lægðar-lausum jólum, þó erfitt sé að spá fyrir um það á þessum tímapunkti.

„Það er of snemmt að fara í nákvæmar veðurspár en það er útlit fyrir svipað veður næstu daga og hefur verið, hlýindi og annað. Það gæti komið hæð yfir landið sem myndi halda lægðum fjarri og þá verður þetta bara rólegheitarveður, en það getur enn breyst.”

Uppfært: Í fyrstu var sagt að ekkert óvissustig væri í gildi vegna náttúruvár. Hins vegar er óvissustig almannavarna í gildi vegna landriss í Öskju. 



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.