Viðskipti innlent

Skerða orku til fiski­mjöls­verk­smiðja, ál­vera og gagna­vera

Eiður Þór Árnason skrifar
Hörður Arnarson, forstjóri Landsvirkjunar.
Hörður Arnarson, forstjóri Landsvirkjunar. Vísir/Vilhelm

Landsvirkjun hefur ákveðið að skerðing á afhendingu raforku til fiskimjölsverksmiðja taki strax gildi, en ekki í janúar eins og ætlað hafði verið. Skerðingin nær einnig til stórnotenda á borð við gagnaver og álver sem eru með skerðanlega skammtímasamninga.

Í þeim samningum er gert ráð fyrir að til skerðinga geti komið þegar eftirspurn eftir raforku er mjög mikil. Þetta kemur fram í tilkynningu frá Landsvirkjun sem hefur þar að auki hafnað öllum óskum nýrra viðskiptavina um orkukaup vegna rafmynta.

Nokkrar ástæður eru sagðar fyrir því að skerðingin komi fyrr til framkvæmda en áætlað hafi verið. Til dæmis komi raforkuvinnsla hjá öðrum framleiðanda, sem átti að koma inn í vikunni, ekki inn í kerfið fyrr en í lok næstu viku.

Þá nægi full keyrsla í Vatnsfelli ekki til að halda uppi orkuframleiðslu á Þjórsársvæði. Að sögn Landsvirkjunar hefur Krókslón lækkað það mikið að byrjað var að hleypa vatni framhjá Vatnsfelli í dag til að stöðva lækkun, en einnig verði að draga úr orkusölu til að draga úr vinnslu. Loks hafi bilun komið upp í vél í Búrfelli og fyrirséð að hún komi ekki í rekstur fyrr en með vorinu.

Frá fiskimjölsverksmiðju Síldarvinnslunnar í Norðfjarðarhöfn.Vísir/Einar

Eftirspurn eftir raforku aukist hratt

Vísir greindi frá því í síðustu viku að Landsvirkjun hafi gripið til þess ráðs að skerða tímabundið raforku til fiskimjölsbræðslna, fiskþurrkana og stórnotenda þann 1. desember. Kom sú skerðing til vegna mikils álags og viðhalds. 

„Eftirspurn eftir raforku hefur aukist hratt undanfarna mánuði. Skerðingarákvæði samninga eru hugsuð til að nota við slíkar aðstæður, það er þegar eftirspurn er meiri en framboð. Fiskimjölsframleiðendur hafa til dæmis notast bæði við olíu og rafmagn í framleiðslu sinni, en samningar undanfarinna ára miðað að því að þeir hafi sem mestan aðgang að raforku. Olían er þó enn nauðsynlegur varaaflgjafi,“ sagði í tilkynningu á vef Landsvirkjunar í síðustu viku. 

Flutningskerfið takmarki afhendingargetu

Að sögn Landsvirkjunar hefur fyrirtækið nú fullnýtt getu flutningskerfisins til að flytja orku frá Norðausturlandi til álagspunkta á Suðvesturlandi og ræður flutningskerfið ekki við að flytja alla þá orku sem hægt væri að færa milli landshluta. 

„Hinn 23. ágúst sl. fylltist Hálslón á Kárahnjúkum og þremur dögum síðar nam afl yfirfallsins um 2000 MW. Á 10 dögum rann því framhjá orka, sem samsvarar heilsárnotkun allra bræðslna á landinu, þegar vertíð er góð. Með sterkara flutningskerfi hefði mátt nýta stóran hluta þeirrar orku sem rann framhjá. 

Áætla má að takmarkanir í flutningskerfinu dragi úr vinnslugetu kerfisins sem nemur allt að 500 GWh. Að loknu sumri með jafn ójafnri dreifingu góðviðrisdaga og raun bar vitni koma áhrifin fram með sérstaklega sterkum hætti,“ segir í tilkynningu sem Landsvirkjun sendi frá sér í dag. 

Fréttin hefur verið uppfærð.


Tengdar fréttir

Lands­virkjun skerti orku til fiski­mjöls­bræðslna

Landsvirkjun greip til þess ráðs í gær að skerða raforku til fiskimjölsbræðslna, fiskþurrkana og stórnotenda. Tekið er fram að þetta hafi einungis verið tímabundin skerðing vegna mikils álags og viðhalds þann daginn en mjölframleiðendum bent á að olía sé enn nauðsynlegur varaaflsgjafi.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×