Þórir segir stress hafa kostað sig og stelpurnar ólympíugullið

Noregur vann til bronsverðlauna á Ólympíuleikunum í Tókýó í sumar. Ekkert nema gull virðist hins vegar nógu gott fyrir liðið og norski miðillinn VG spurði Þóri út í það hvað hefði gert það að verkum að Noregur varð ekki ólypíumeistari:

„Það er sameiginleg niðurstaða þjálfaranna og leikmannahópsins að við vildum of mikið. Þetta var nú eða aldrei. Það þýddi að við fórum að hugsa um afleiðingarnar. Þetta truflaði okkur,“ sagði Þórir.

Noregur vann Ungverjaland í 8-liða úrslitum eftir ofurframmistöðu hinnar 41 árs gömlu Katrine Lunde í markinu. Þórir segir að stressið yfir því að geta dottið úr leik hafi ekki bitið á alla leikmenn:

„En það varð of ráðandi og smitandi,“ sagði Þórir.

Noregur tapaði í undanúrslitum á móti Rússum, 27-26, eftir að hafa mest verið sex mörkum undir í leiknum.

„Menn reyndu að vinna sig út úr þessu en við náðum ekki að snúa við blaðinu nógu snemma. Það er alveg dæmigert að við skyldum snúa því við þegar við höfðum lent svona langt undir,“ sagði Þórir.

Norska liðið mætir heimsmeisturum Hollands í dag á æfingamóti, og svo Suður-Kóreu og Rússlandi. Fyrsti leikur liðsins á HM verður gegn Kasakstan 3. desember.