Erlent

Senda hundruð Talibana gegn Íslamska ríkinu

Samúel Karl Ólason skrifar
Talibanar á ferð um götur Jalalabad.
Talibanar á ferð um götur Jalalabad. Gettu

Talibanar ætla að auka á þrýsting þeirra gegn Íslamska ríkinu í Afganistan. Hundruð Talibana hafa verið sendir til austurhluta landsins þar sem þeir eiga að herja á vígamenn ISIS.

Minnst þrettán hundrað Talibanar taka þátt í aðgerðum í Nangahar-héraði og hefur árásum þeirra gegn ISIS fjölgað töluvert. Meðal annars hefur árásum fjölgað þar sem Talibanar ráðast til atlögu gegn grunuðum ISIS-liðum að nóttu til.

Íbúar og Talibanar segja í samtali við Washington Post að af þeim hundruðum sem hafa verið handteknir af Talibönum hafi fjölmargir horfið eða verið myrtir.

„Baráttan er erfið og stundum grimmileg en við verðum að þurrka Daesh(ISIS) út ekki bara fyrir Afganistan heldur fyrir heiminn allan,“ sagði Qari Nurullah Fateh, einn af Talibönum sem berjast gegn iSIS í Jalalabad.

„Ef einhver gefst ekki upp fyrir okkur, drepum við hann.“

Hann áætlar að í Jalalabad séu sjö til tíu grunaðir ISIS-liðar handteknir í viku hverri og um six séu drepnir.

Segja ISIS-liðum hafa vaxið ásmegin

Sameinuðu þjóðirnar áætla að ISIS-liðum hafi vaxið ásmegin í Afganistan í kjölfar skyndilegrar yfirtöku Talibana þar. Harðar aðgerðir Talibana eru þar að auki sagðar hafa leitt til fjölgunar í röðum Íslamska ríkisins sem hefur dreift sér um landið og er nú sagt vera með viðveru í öllum héruðum Afganistans.

Í frétt Reuters frá því í síðustu viku er vitnað í sérstakan erindreka Sameinuðu þjóðanna sem sagði ISIS-liðar noti það að Talibanar handaki og bani grunuðum vígamönnum, til að fá fólk til að ganga til liðs við Íslamska ríkið.

Deborah Lyons, erindrekinn, sagði að alþjóðasamfélagið þyrfti að fylgjast betur með aðstæðum í Afganistan og að Talibanar hefðu ekki getað staðið nægilega vel í hárinu á ISIS-liðum.

Hún sagði einnig að þrátt fyrir að Talibanar reyndu að setja upp raunverulega ríkisstjórn í Afganistan útilokuðu þeir alla aðra þjóðflokka og græfu undan réttindum kvenna og stúlkna. Þar að auki varaði Lyons við mögulega erfiðum aðstæðum í vetur vegna slæms ásigkomulags efnahags Afganistans og þurrka.

Tóku rúmlega fjörutíu af lífi og hengdu upp lík þeirra

Þegar ISIS-liðar hófu árásir sínar í Jalalabad í Nangahar-héraði, skömmu eftir yfirtöku Talibana brugðust Talibanar við með að taka af lífi nokkra menn sem grunaðir voru um að hafa hjálpað ISIS-liðum og hengja lík þeirra á fjölförnum vegum í borginni.

Fateh sagði Washington Post að þetta hefðu verið rétt viðbrögð og þeim hefði verið ætlað að sýna fólki afleiðingar þess að starfa með ISIS. Aðrir vígamenn sem rætt var við staðfestu frásögn hans.

Hann sagðist sjálfur hafa hengt upp tvö líkanna og giskaði á að í heildina hefðu lík rúmlega fjörutíu manna verið hengd upp.

„Þetta var mjög skilvirk leið til að bregðast við,“ sagði Fateh.

Ofbeldið eykst

Ofbeldið hefur bara aukist í kjölfar þessara morða og íbúar Jalalabad segjast óttast að aðferðir Talibana hjálpi ISIS-liðum. Talibanar hafa verið beðnir um að hætta að drepa fólk án dóms og laga en íbúar segja að annars verði erfitt að koma í veg fyrir að ungir menn gangi til liðs við Íslamska ríkið í Afganistan.

Talið er að á milli tvö þúsund og 3.500 ISIS-liðar séu í Afganistan. Vígamenn Talibana eru aftur á móti taldir vera um sjötíu þúsund.


Tengdar fréttir

Mannskæð árás á sjúkrahús í Afganistan

Minnst nítján eru látnir og 50 særðir eftir árás á hersjúkrahús í Kabúl í Afganistan í dag. Fregnir bárust í morgun af sprengingum og skothríð við Sardar Daud Khan sjúkrahúsið. Í kjölfar þess hafa fregnir borist af skotbardögum á lóð sjúkrahússins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.