Pop-up í Pipar og Salt

Pipar og salt 19. nóvember 2021 08:52

„Pipar og Salt var í raun fyrsta alvöru kokkabúðin á Íslandi með mikla sérvöru sem fékkst ekki annarsstaðar."

Þau Sigríður Þorvarðardóttir og Paul Newton bjóða gestum til stofu heima hjá sér á morgun en þau ráku Pipar og salt í 27 ár.

Dyrnar að hinni ástsælu verslun Pipar og Salt að Klapparstíg 44 verða opnaðar aftur á morgun, laugardag, þegar blásið verður til Pop-up viðburðar. Þau Sigríður Þorvarðardóttir og Paul Newton bjóða gestum til stofu heima hjá sér þennan laugardag en þau ráku verslunina í 27 ár samfleytt áður en þau færðu reksturinn yfir í vefverslun árið 2015.

Þau Sigríður Þorvarðardóttir og Paul Newton ráku verslunina í 27 ár samfleytt áður en þau færðu reksturinn yfir í vefverslun árið 2015. Dóttir þeirra Anna Kristín Newton og Margrét H. Skúladóttir reka vefverslunina í dag.

„Þetta er þeirra ævistarf. Búðin var á neðri hæðinni í þessu fallega timburhúsi sem þau gerðu upp. Sjálf búa þau á efri hæðinni og Popup verslunin verður þar, inni í stofu hjá þeim. Þau ætluðu sér að setjast í helgan stein þegar þau lokuðu versluninni 2015 en gátu það náttúrlega ekkert þegar á hólminn var komið og opnuðu vefverslun, sem er opin allan ársins hring,“ segir Anna Kristín Newton, dóttir hjónanna en hún heldur nú utan um rekstur vefverslunarinnar ásamt Margréti H. Skúladóttur.

„Við Margrét tökum við góðu búi og mikilli arfleifð. Pipar og Salt var í raun fyrsta alvöru kokkabúðin á Íslandi með mikla sérvöru sem fékkst ekki annarsstaðar. Fyrsta sushisettið fékkst til dæmis í Pipar og salt og skemmtilegar bökunarvörur sem höfðu ekki sést hérlendis á þessum tíma, kínverskar skálar sem voru illfáanlegar annarsstaðar og ýmislegt fleira. Þau eru miklir frumkvöðlar og matgæðingar sjálf,“ segir Anna Kristín, þær Margrét leggi mikla áherslu á góða og persónulega þjónustu í takt við sögu Pipars og Salt.

„Það er ákveðinn þrýstingur að standa undir því þjónustustigi sem þau héldu úti en við höfum mikinn metnað fyrir því. Pipar og Salt á stóran, tryggan hóp viðskiptavina og ómetanlegt hvað fólk hefur fylgt þessari búð. Þess vegna verður ótrúlega gaman að geta boðið fólki að koma í „gömlu búðina“ og hitta fyrrum eigendur. Þau hlakka líka mikið til að taka vel á móti sínum viðskiptavinum, bæði gömlum og nýjum. Það verður passað upp á sóttvarnir, grímur á staðnum og gott pláss og vonum að fólk sjái sér fært um að kíkja til okkar.“

Anna Kristín segir kjörið tækifæri á laugardaginn til þess að kaupa fallegar jólagjafir í versluninni. Þær Margrét leggi áherslu á textílvöru, trévörur og gólfmottur.

„Við vorum einmitt að hlaða inn á vefsíðuna nýjum vörum. Við erum alltaf með sænsku vínylmotturnar sem njóta mikilla vinsælda. Þær eru frábærar bæði inni og úti og má þvo í þvottavél. Þær eru stamar á gólfi, gefa góða dempun, halda sér vel og svo má snúa þeim við auk þess sem þær eru fallegar og margar skemmitlega skrautlegar. Þá eigum við afar fallega textílvöru, viskustykki og löbera frá Finnlandi, sem eru mjög vönduð og endingargóð.

Við eigum svo alltaf gott úrval af handgerðum trévörum frá Svíþjóð og Finnlandi sem eru sérstaklega fallegar fyrir jól og páska. Við viljum halda þessari sérstöðu og leggjum okkur líka fram um að bjóða gæða vörur á sanngjörnu verði. Hægt er að fylgjast með breytilegu vöruframboði okkar og viðburðum á vefsíðu okkar, Facebook og Instagram. Hlökkum til að sjá sem flesta á laugardaginn.