Meira en eitt heilt ár á milli leikja íslenska kvennalandsliðsins í riðlinum

Óskar Ófeigur Jónsson skrifar 15. nóvember 2021 16:31

Íslensku stelpurnar koma sér í gang fyrir leikinn á móti Ungverjum í gær. Vísir/Bára Dröfn

Íslenska kvennalandsliðið í körfubolta tapaði í gær á móti Ungverjalandi í undankeppni EM og hefur nú leikið tvo fyrstu leiki sína í riðlinum. Það er aftur á móti mjög langt í næsta leik hjá íslensku stelpunum.

FIBA skipuleggur undankeppnina þannig að íslenska liðið spilar ekki næsta leik sinn í riðlinum fyrr en 24. nóvember 2022.

Það munu því líða eitt heilt ár og tíu dagar að auki á milli leikja liðsins.

Ísland spilaði tvo leiki í þessum glugga en hinir gluggarnir verða í nóvember 2022 og í febrúar 2023.

Ísland tapaði naumlega í Rúmeníu í fimmtudaginn og spilaði síðan fyrsta heimaleik sinn á móti Ungverjalandi á Ásvöllum. Fjórða liðið í riðlinum er síðan lið Spánverja sem á að vera sterkasta lið riðilsins.

Spánn vann fjögurra stiga útisigur á Ungverjum í fyrsta leik og vann síðan 55 stiga sigur á Rúmeníu í gær.

Landsliðsfyrirliðinn Helena Sverrisdóttir og landsliðsmiðherjinn Hildur Björg Kjartansdóttir gátu hvorugar spilað með landsliðinu í þessum glugga vegna meiðsla og munaði mikið um þær.

Það er vonandi að KKÍ finni íslenska liðinu verkefni á næstu tólf mánuðum en liðið hefur aðeins spilað mótsleiki undanfarin ár. Það yrði mjög erfitt fyrir liðið að bíða í meira en heilt ár á milli leikja hjá sér.

Körfubolti EM 2023 í körfubolta