Handbolti

Þjálfari KA í hand­bolta segir Akur­eyra­rbæ vera gjör­sam­lega metnaðar­lausan

Óskar Ófeigur Jónsson skrifar
Jónatan Þór Magnússon að stýra KA liðinu í leik í Olís deild karla í handbolta.
Jónatan Þór Magnússon að stýra KA liðinu í leik í Olís deild karla í handbolta. Vísir/Hulda Margrét

Aðstöðumál handboltans á Akureyri virðast ekki vera í góðum málum ef marka má það að Jónatan Þór Magnússon, þjálfari karlaliðs KA í Olís deildinni, sendi í gær bæjarstjórn Akureyrar og ráðamönnum í höfuðstað Norðurlands, tóninn, í harðorðari færslu á fésbókinni.

„Hér virðist bæjarstjórn og ráðamenn skammast sín fyrir að byggja upp til íþrótta, telja það óþarfa kostnað en ekki fjárfestingu til framtíðar í öflugu íþróttastarfi og heilbrigðu líferni. Bærinn er gjörsamlega metnaðarlaus þegar kemur að því að skara framúr,“ skrifaði Jónatan Þór en fyrirsögn pistils hans er „Metnaðarleysi“.

Jónatan Þór er á því að það sé skammarlegt fyrir bæ eins og Akureyri að aðstöðuskortur skuli vera alvarleg hindrun fyrir íþróttafólk á Akureyri á öllum aldri.

„FH, Haukar, HK, ÍBV, UMFA, Valur, Grótta og Stjarnan hafa öll tvo til þrjá íþróttasali í sinni aðstöðu með stórum áhorfendastúkum og flottri aðstöðu til lyftinga og geggjaðri aðstöðu fyrir áhorfendur, ársmiðahafa, fjölmiðla og fleira (auðvitað mismunandi eftir félögum) – og ekkert af þessum liðum þarf að deila keppnisgólfinu með meira en einu öðru liði (þá hinu kyninu í sömu íþrótt),“ skrifað Jónatan. Hann tekur sem dæmi búningsklefa KA-liðsins sem er í kompu sem eitt sinn var geymsla og það er meira segja engin sturta í klefanum þeirra.

„Af hverju er ekki hægt að byggja almennilega upp hér fyrir íþróttir? Nota bene, þegar er byggt upp fyrir íþróttir er það ekki bara fyrir meistaraflokkinn – heldur líka þau 1300 börn sem æfa hjá KA, hvort sem það er handbolti, fótbolti, blak, júdó eða badminton,“ skrifar Jónatan.

„Ef ég ber aðstöðu míns liðs saman við ÖLL önnur lið í efstu deild erum við á botninum,“ skrifar Jónatan Þór Magnússon en allan pistil hans má sjá hér fyrir neðan.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.