Býst við minnisblaði frá Þórólfi um innanlandsaðgerðir í dag

Kristín Ólafsdóttir skrifar 4. nóvember 2021 14:42

Svandís Svavarsdóttir heilbrigðisráðherra býst við því að fá minnisblað frá sóttvarnalækni um aðgerðir innanlands í dag. Þá reiknar hún með því að ræddur verði möguleiki á hertum aðgerðum innanlands á ríkisstjórnarfundi í fyrramálið.

Þetta staðfestir Svandís í samskiptum við fréttastofu. Þórólfur Guðnason sóttvarnalæknir sagði í samskiptum við fréttastofu nú eftir hádegi að það væri „aldrei að vita“ nema hann byrjaði að huga að minnisblaði um hertar innanlandsaðgerðir fyrir ríkisstjórnarfund á morgun.

144 greindust með kórónuveiruna innanlands í gær. Aðeins tvisvar hafa fleiri greinst á einum degi frá upphafi faraldursins og þá hafa aldrei fleiri greinst utan sóttkvíar en í gær, eða 104.

Þórólfur sagði í samtali við fréttastofu í morgun að hann hefði áhyggjur af stöðunni. Hann íhugaði nú leiðir til að bregðast við henni.

„Ég held það þurfi allir að hugsa það hvað þurfi að gera til að stoppa þetta. Og við vitum hvað þarf til. Og við þurfum að taka höndum saman og hugsa það mjög vel og það er það sem ég hef verið að ræða við stjórnvöld,“ sagði Þórólfur í morgun, inntur eftir því hvort kæmi til greina að leggja til hertar aðgerðir.

Faraldur kórónuveiru (COVID-19) Samkomubann á Íslandi Ríkisstjórn Katrínar Jakobsdóttur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.