Sólveig Anna Jónsdóttir tilkynnti um afsögn sína sem formaður Eflingar vegna innanhússdeilna á skrifstofu Eflingar á sunnudagskvöld. Viðar hætti störfum fyrir félagið í kjölfarið. Ástæða afsagnar Sólveigar Önnu var sú að hún taldi að starfsfólk á skrifstofu Eflingar hefði lýst yfir vantrausti á sig með því að draga ekki til baka ályktun frá því í sumar þar sem það lýsti ótta við fyrirvaralausar uppsagnir og ógnarstjórn þegar hún fór fram á það á föstudag.
Viðar var spurður út í atganginn á skrifstofu Eflingar í viðtali í Kastljósi á Ríkisútvarpinu í kvöld. Þar sagði hann að stjórnendur félagsins hefðu rætt við trúnaðarmenn eftir að starfsfólkið samþykkti ályktun sína í júní. Hann hafi talið að þar með væri málið leyst.
Af einhverjum ástæðum hefði ályktunin haldið áfram í umferð og umræðu. Guðmundur Baldursson, stjórnarmaður hjá Eflingu, hafi fengið pata af tilvist hennar og hafið herferð til að fá hana afhenta. Þá hafi mannauðsstjóri verið fenginn til að kynna fyrir stjórninni umbætur í starfsmannamálum og aðrir stjórnarmenn en Guðmundur verið sáttir við stöðuna í þeim.
Komist upp með grófar og ósannar ásakanir
Í ályktuninni sem um ræðir lýstu starfsmenn vanlíðan í vinnunni og ótta við fyrirvaralausar uppsagnir. Viðar gaf lítið fyrir þær lýsingar í Kastljósi og sagði að sér væri ekki kunnugt um að ástandið sem í henni var lýst hafi verið raunverulegt.
Spurður að því hvers vegna svo mikill munur væri á upplifun starfsfólksins annars vegar og lýsingum þeirra Sólveigar vísaði Viðar til menningar sem hafi myndast strax eftir að Sólveig Anna var kjörin formaður Eflingar árið 2018.
Efling hafi þá ekki verið raunveruleg baráttusamtök um áratugaskeið og til að breyta því hafi þurft að ráðast í stórtækar breytingar á rekstri og skipulagi, þar á meðal í ráðningum og skipulagsmálum. Margir úr stjórnendahóp félagsins hafi hætt sjálfviljugir.
Óánægðir fyrrverandi starfsmenn hafi í kjölfarið farið af stað með neikvæða umfjöllun og rógburð um kjarasamningsbrot í fjölmiðlum. Viðar fullyrti að þetta hefði haft mikil áhrif á vinnustaðinn og umræðuna um félagið og forystusveit þess. Þetta hefði leitt til þess að fólk hafi talið sig geta komist auðveldlega upp með að fara fram með grófar og ósannar ásakanir á hendur Sólveigu Önnu og honum.
Þessi reynsla hafi mótað hugi kjarna starfsfólks á vinnustaðnum þannig að þegar upp hafi komið annars auðleysanleg vandamál hafi verið farið út í menninguna sem var komið af stað árið 2018.
„Ég kalla þetta hálfgerða ofbeldismenningu,“ sagði Viðar.
Starfsfólk haldi trúverðugleika Eflingar í gíslingu
Þegar Viðar var spurður út í ánægju starfsfólks á skrifstofunni sem þau Sólveig Anna réðu þangað inn sagðist hann ekki geta rætt óánægju einstakra starfsmanna.
Lærdómurinn sem þau Sólveig Anna drægju af reynslu sinni væri að ekki hafi verið nógu langt gengið í að endurheimta félagið til félagsmanna og að starfsfólk þess hafi haldið trúverðugleika þess í gíslingu. Það hafi verið tilbúið að setja formanninn í þá stöðu að lýsa henni og stjórnarháttum hennar sem ofbeldi og kjarasamningsbrotum vegna sjálfsagðra skipulagsbreytinga.
Sagði hann þau Sólveigu Önnu hafa þurft að láta af störfum þar sem þau hafi verið svipt trúverðugleika sínum í að ræða um raunveruleg vandamál og brot gegn félagsmönnum Eflingar vegna ásakananna á hendum þeim.
