Bankarnir þrír högnuðust um sextíu milljarða

Tryggvi Páll Tryggvason skrifar 29. október 2021 09:06

Stóru bankarnir þrír, Arion banki, Landsbankinn og Íslandsbanki. Vísir

Sé hagnaður stóru viðskiptabankanna þriggja hér á landi fyrir fyrstu níu mánuði ársins lagður saman nemur hann rétt rúmlega 60 milljörðum króna.

Arion banki, Landsbanki og Íslandsbanki kynntu uppjör sín fyrir þriðja ársfjórðung ársins í vikunni. Samtals högnuðust þeir um 23 milljarða króna á ársfjórðungnum, sem er rúmlega tvöföldun frá sama ársfjórðungi síðasta árs, þegar hagnaðurinn nam ellefu milljörðum króna.

Arion banki hagnaðist mest á ársfjórðungnum, um 8,2 milljarða. Því næst Íslandsbanki en hann hagnaðist um 7,6 milljarða. Landsbankinn rekur lestina með 7,5 milljarða hagnað.

Sé litið til fyrstu níu mánaða ársins er ljóst að hagnaður bankanna hefur aukist mjög á milli ára. Arion banki hefur hagnast um 22,1 milljarð á árinu, Landsbankinn um 21,6 milljarða króna og Íslandsbanki um 16,6 milljarða króna. Alls eru þetta rétt rúmlega 60 milljarðar króna

Á fyrstu níu mánuðum síðasta árs hagnaðist Arion banki um 6,7 milljarða króna, Íslandsbanki um 3,2 milljarða króna og Landsbankinn um 700 milljónir króna. Alls högnuðust bankarnir þrír því um 10,6 milljarða króna á síðasta ári.

Hagnaður bankanna þriggja hefur því nærri sexfaldast, farið úr 10,6 milljörðum króna í 60 milljarða króna, sé fyrstu níu mánuðir síðasta árs bornir saman við fyrstu níu mánuði þessa árs.

Íslenskir bankar Efnahagsmál Kauphöllin

Tengdar fréttir

Arion banki hagnaðist um 8,2 milljarða króna

Arion banki hagnaðist um 8.238 milljónir króna á þriðja ársfjórðungi og var arðsemi eiginfjár 17,0% á fjórðungnum samanborið við 8,3% á sama tímabili í fyrra.

27. október 2021 17:54

Landsbankinn hagnast um 7,5 milljarða

Hagnaður Landsbankans á þriðja ársfjórðungi 2021 var 7,5 milljarðar króna. Afkoma bankans á fyrstu níu mánuðum ársins 2021 var jákvæð um 21,6 milljarða króna samanborið við 699 milljónir á sama tímabili árið 2020.

28. október 2021 12:35

Íslandsbanki hagnaðist um 7,6 milljarða

Íslandsbanki hagnaðist um 7,6 milljarða króna á þriðja ársfjórðungi og hefur afkoma bankans ekki verið betri í fimm ár. Til samanburðar hagnaðist Íslandsbanki um 3,4 milljarða á sama tíma í fyrra.

28. október 2021 17:37

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.