Íslandsbanki hagnaðist um 7,6 milljarða

Arðsemi eiginfjár var 15,7% á ársgrundvelli í lok september og er það bæði yfir fjárhagslegum markmiðum bankans og spám greiningaraðila.

Hreinar vaxtatekjur hækkuðu úr 8,3 í 8,8 milljarða króna milli ára. Hækkunin á milli ára er tilkomin vegna stækkunar á lánasafni bankans.

Íslandsbanki birti fjárhagsuppgjör sitt í dag en bankinn hagnaðist um 9,0 milljarða króna á fyrstu sex mánuðum ársins.

Fram kemur í tilkynningu frá bankanum að hreinar þóknanatekjur hafi aukist um 20% á milli ára og námu samtals 3,4 milljörðum á þriðja ársfjórðungi 2021. Eignastýring, fjárfestingarbanki og verðbréfaviðskipti leiddu hækkunina.

Jákvæð virðisrýrnun

Kostnaðarhlutfall bankans lækkaði á milli ára og fór úr 46,7% í fyrra í 39,4% í lok síðast ársfjórðungs. Var það aðallega vegna sterkrar rekstrarafkomu og hagkvæmari reksturs, að sögn stjórnenda.

Eigið fé bankans nam 197 milljörðum króna í lok september og heildareiginfjárhlutfall bankans var 24,7%, að hagnaði fjórðungsins meðtöldum, samanborið við 23,0% í árslok 2020.

Virðisrýrnun var jákvæð á þriðja ársfjórðungi um 1,8 milljarð króna og skýrist helst af batnandi útliti í ferðaþjónustu og lækkaðri virðisrýrnun á lánum til einstaklinga vegna uppfærðs áhættumatslíkans.

Bjartari horfur í ferðaþjónustu

Birna Einarsdóttir, bankastjóri Íslandsbanka, segir að bætt afkoma frá fyrra ári skýrist helst af jákvæðri virðisrýrnun en undirliggjandi rekstur sé einnig gríðarsterkur. Viðsnúningur virðisrýrnunar sé tilkominn vegna bjartari horfa í ferðaþjónustu og er hrein virðisbreyting útlána til viðskiptavina áfram á réttri leið.

„Kostnaðarhlutfall var 39,4% sem er undir markmiðum bankans og er tilkomið vegna góðrar tekjumyndunar og hagræðingaraðgerða á undanförnum misserum. Með þessari frammistöðu er Íslandsbanki á góðri leið með að ná 10% arðsemi á ársgrundvelli til lengri tíma litið. Þar að auki var útgáfa víkjandi skuldabréfs að upphæð 750m. kr. sænskra króna á fjórðungnum liður í þeirri vegferð að besta samsetningu efnahagsreiknings bankans,“ segir Birna í tilkynningu.

Útlán til viðskiptavina drógust saman um 0,8% á fjórðungnum og voru 1.081 milljarðar króna í lok september þar sem aukning í fasteignalánum hefur dregist saman í kjölfar vaxtahækkana Seðlabanka Íslands.

Útlán til viðskiptavina hafa aukist um 7,4% frá árslokum, aðallega vegna umsvifa í húsnæðislánum auk þess sem vöxtur var í lánum til fyrirtækja.

Innlán frá viðskiptavinum drógust saman um 11 milljarða á þriðja ársfjórðungi sem skýrist af uppgjöri vegna sölu bankans. Innlán frá viðskiptavinum hafa aukist um 75 milljarða króna frá árslokum.

Brátt búin að uppfæra öll grunnkerfi bankans

Að sögn Birnu var notkun stafrænna lausna á þriðja ársfjórðungi meiri en nokkru sinni fyrr. Þá hafi bankinn tekið þátt í útgáfu grænna/blárra skuldabréfa Brims og samfélags skuldabréfs Grunnstoðar, dótturfyrirtækis Háskólans í Reykjavík.

„Innleiðing nýs lánakerfis gengur vel og samkvæmt áætlun er stefnt að því að innleiðingu verði lokið fyrir áramót. Þá mun bankinn hafa lokið uppfærslu á öllum grunnkerfum bankans sem gerir okkur enn betur í stakk búin að þjónusta viðskiptavini okkar með stafrænum hætti.“