Allt annað að fara um borð í Strætó

Starfsmenn Strætó standa í ströngu þessa dagana við að búa alla vagna nýju kerfi sem verður tekið í notkun 16. nóvember. Það eru jafnvel erlendir sérfræðingar á staðnum, en Strætó keypti kerfið hjá norsku fyrirtæki. Það ber nafnið KLAPP.

Þegar breytingarnar taka gildi verða þrjár leiðir til þess að fara um borð í Strætó. Í fyrsta lagi er það einfaldur farmiði úr pappír sem þó er hægt að fylla á með appi. Næst er það eiginlegt strætókort sem er þó ekki auðkennt með andliti eins og hin gömlu. Og í þriðja lagi er það miði í símanum sem er skannaður við innganginn.

Ferlið má sjá í fréttinni hér:

Við þetta bætist að í fjarlægari framtíð er stefnt að því að taka við hefðbundnum greiðslukortum. Í bili þýðir þetta að hægt og rólega heyra gömlu strætómiðarnir sögunni til - og samhliða þeim, skiptimiðarnir. Það sama gildir um gömlu strætókortin sem voru auðkennd með andliti korthafans. Þetta gerist þó ekki í hvelli heldur verður gamla kerfinu leyft að lifa með því nýja á aðlögunartímanum.

„Ef þú ert með kort til dæmis leyfum við þeim bara að renna út en eftir svona ár eða svo verðum við alveg búin að skipta yfir í nýja kerfið,“ segir Guðmundur Heiðar Helgason, upplýsingafulltrúi Strætó bs.

Miklu erfiðara að svindla

Gömlu farmiðarnir munu gilda í þrjá mánuði eftir að nýja kerfið tekur gildi - þannig að ef þú átt vænt spjald heima er best að klára það fyrir miðjan febrúar. En breytingarnar munu einfalda störf bílstjóra til muna.

„Í dag er kerfið þannig að þú sýnir bara bílstjóranum fargjaldið þitt eða setur það í bauk. Það hefur því hingað til verið nokkuð auðvelt fyrir fólk að svindla ef það er að reyna það. Þannig að þessi ábyrgð, að staðfesta fargjöld með augunum er núna horfin. Nú sér hann bara grænt eða rautt ljós,“ segir Guðmundur.

Umfang verkefnisins hafi komið á óvart. Útvega hafi þurft tækjabúnað, forritara og svo hafi þurft að þjálfa starfsmenn í nýju kerfi. Það er semsagt langt og flókið ferli að baki í miðjum heimsfaraldri.

„Nú líður mér eins og við séum loksins komin á þann stað sem flest almenningssamgöngufyrirtæki eru í kringum okkur. Þannig að við erum bara mjög sátt við það,“ segir Guðmundur.