Körfubolti

Baldur hefur tapað fimm sinnum í röð á móti Val

Óskar Ófeigur Jónsson skrifar
Baldur Þór Ragnarsson mætir ekki beint uppáhaldsmótherjum sínum í fyrsta leik.
Baldur Þór Ragnarsson mætir ekki beint uppáhaldsmótherjum sínum í fyrsta leik. Vísir/Daníel

Tindastóll tekur á móti Val í Subway-deild karla í körfubolta í stórleik kvöldsins en þetta er fyrsti deildarleikur liðanna á tímabilinu.

Það var mikil spenna í fyrstu umferð Subway deildarinnar í gærkvöldi og fjörið heldur áfram í kvöld þegar fyrsta umferðin klárast.

Leikur Tindastóls og Vals hefst klukkan 20.15 og verður sýndur beint á Stöð 2 Sport. Á eftir leiknum mun Körfuboltakvöld síðan gera upp alla fyrstu umferðina.

Bæði lið Tindastóls og Vals hafa breyst talsvert frá síðustu leiktíð og því verður athyglisvert að sjá hvernig þau hentu hvoru öðru inn á vellinum.

Þjálfararnir eru þeir sömu og í fyrra en í fyrra fagnaði Finnur Freyr Stefánsson sigri í báðum leikjunum við Tindastól. Finnur hefur líka tvisvar orðið Íslandsmeistari eftir sigur á Stólunum í lokaúrslitum. Hann á því margar góðar minningar frá leikjum við Stólanna.

Aðra sögu er að segja af minningum kollega hans sem stýrir málum hjá heimamönnum.

Baldur Þór Ragnarsson þjálfar áfram Tindastólsliðið en þetta er hans þriðja tímabil á Sauðárkróki.

Valsmenn hafa reynst honum afar erfiður mótherji sem þjálfari í úrvalsdeildinni og nær það aftur til þess tíma sem hann þjálfaði Þórsliðið.

Undir stjórn Baldurs hafa Stólarnir tapað síðustu fjórum deildarleikjum sínum á móti Val en að auki þá tapaði Baldur líka síðasta leiknum á móti Val sem þjálfari liðs Þórs úr Þorlákshöfn.

Baldur hefur því tapað fimm síðustu leikjum sínum á móti Val sem þjálfari í úrvalsdeild karla.

  • Leikir liða Baldurs Ragnarssonar á móti Val í úrvalsdeild karla:
  • 18. mars 2021: 11 stiga tap Tindastóls á móti Val (79-90)
  • 21. janúar 2021: 6 stiga tap Tindastóls á móti Val (71-77)
  • 24. janúar 2020: 2 stiga tap Tindastóls á móti Val (89-91)
  • 24. október 2019: 3 stiga tap Tindastóls á móti Val (92-95)
  • 14. mars 2019: 9 stiga tap Þórs á móti Val (87-96)
  • 20. desember 2018: 16 stiga sigur Þórs á Val (114-98)



Fleiri fréttir

Sjá meira


×