Enski boltinn

Xhaka frá í þrjá mánuði

Ingvi Þór Sæmundsson skrifar
Granit Xhaka haltraði af velli í leik Arsenal og Tottenham.
Granit Xhaka haltraði af velli í leik Arsenal og Tottenham. getty/Stuart MacFarlane

Granit Xhaka, leikmaður Arsenal, verður frá næstu þrjá mánuðina vegna hnémeiðsla.

Svisslendingurinn meiddist í 3-1 sigri Arsenal á Tottenham í Norður-Lundúnaslagnum í ensku úrvalsdeildinni á sunnudaginn.

Xhaka þarf ekki að fara í aðgerð en talið er að hann þurfi þrjá mánuði til að ná sér góðum af meiðslunum.

Hinn 29 ára Xhaka hefur leikið fjóra af sex leikjum Arsenal í ensku úrvalsdeildinni á tímabilinu. Skytturnar hafa unnið þrjá leiki í röð eftir að hafa tapað fyrstu þremur leikjum sínum.

Xhaka kom til Arsenal frá Borussia Mönchengladbach fyrir fimm árum. Hann var sterklega orðaður við Roma í sumar en skrifaði á endanum undir nýjan samning við Arsenal.

Næsti leikur Arsenal er gegn Brighton síðdegis á laugardaginn. Arsenal er í 10. sæti ensku úrvalsdeildarinnar en Brighton í því sjötta.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.