Kári Árna fagnar titlinum á kosningakvöldi: „Við náðum að klára okkar og ég vona að minn flokkur nái að klára sitt“

Þorgils Jónsson skrifar 25. september 2021 21:53

Kári Árnason fagnaði Íslandsmeistaratitili með Víkingum í dag. Hann kaus utan kjörfundar í fyrradag og vonar að sinn flokkur verði líka sigursæll.

„Þetta er bara lyginni líkast og eitthvað sem við bjuggumst ekki við svona snemma í ferlinu, en við erum búnir að klára þetta og ánægjan eftir því.“

Þetta sagði Kári Árnason, landsliðsmiðvörður og nýbakaður Íslandsmeistari í fótbolta með Víkingum í samtali við Sunnu Karen Sigurþórsdóttur fréttakonu í kvöld. Sunna hitti á Kára í lokahófi Víkinga í Hörpu, en eins og gefur að skilja var Kári vant við látinn í dag, þegar síðasta umferðin í Pepsi Max deild karla fór fram og átti þess ekki kost að fara á kjörstað.

Hann sýndi þó fyrirhyggju og kaus utan kjörfundar.

„Ég kaus, utan kjörstaðar, í fyrradag. Skilaði mínu.“

Kári vildi ekki gefa upp um hvert atkvæðið hefði farið en jánkaði því að hafa kosið rétt.

Hann sá fram á gleði í kvöld, enda Víkingar að fagna fyrsta meistaratitli sínum í 30 ár. Hann gerði þó ráð fyrir að fylgjast líka með niðurstöðum kosninganna.

„En aðalatriðið er að við náðum að klára okkar og ég vona að minn flokkur nái að klára sitt. Þannig að þá verður það eftir þessu.“

Klippa: Kári Árnason kaus í fyrradag

Alþingiskosningar 2021 Víkingur Reykjavík Fótbolti Reykjavík

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.