Enski boltinn

Treyjasala upp úr öllu valdi þökk sé Ed Sheeran

Valur Páll Eiríksson skrifar
Ný treyja Ipswich Town er gríðarvinsæl þökk sé auglýsingu Ed Sheerans.
Ný treyja Ipswich Town er gríðarvinsæl þökk sé auglýsingu Ed Sheerans. Ipswich Town

C-deildarlið Ipswich Town á Englandi hefur óvænt rokið upp lista yfir þau lið í landinu sem hafa selt flestar treyjur og er á meðal þeirra 20 efstu. Þar er að þakka miklum stuðningsmanni félagsins, tónlistarmanninum Ed Sheeran.

Sheeran hefur stutt félagið frá barnæsku en það hefur verið í betri stöðu en í dag. Liðið var í úrvalsdeild í upphafi aldarinnar, á meðan Hermann Hreiðarsson lék með liðinu, og vann Evróputitil undir stjórn Sir Bobby Robson í upphafi níunda áratugarins.

Síðusutu ár hafa hins vegar verið félaginu strembin og hefur liðið meira að segja átt í erfiðleikum með að finna almennilegan auglýsingasamning tengdan treyjum þess.

Ed Sheeran hefur stutt Ipswich Town frá barnæsku.Ipswich Town

Sheeran steig þar inn í sumar og keypti auglýsingu framan á treyjur liðsins. Þar má sjá tónleikaferðalag hans auglýst. Auglýsingin virðist hafa komið félaginu á kortið þar sem félagið hefur selt 156 prósent fleiri treyjur í sumar heldur en í fyrra.

Treyjur eru nú uppseldar í vefsölu hjá félaginu og vinnur framleiðandinn Adidas hörðum höndum að því að framleiða fleiri treyjur.

Liðið hefur selt flestar treyjur af öllum liðum í C-deildinni og er það í 17. sæti yfir flestar seldar treyjur á meðal enskra félaga í sumar. Úrvalsdeildarlið á við Burnley, Watford, Brighton og Southampton auk granna Ipswich í Norwich City, eru öll fyrir neðan liðið á listanum.

Efst á lista er Chelsea og þar á eftir Liverpool. Arsenal er í þriðja sæti, Manchester City í því fjórða þar sem kaupin á Jack Grealish hafa haft sitt að segja, óvænt á undan Manchester United sem er í fimmta sæti.

United mun þó vafalaust fara á topp listans áður en langt er um liðið vegna kaupa félagsins á Cristiano Ronaldo. Treyjur félagsins í Jóa útherja hér á Íslandi seldust hratt upp í gær eftir að kynnt var um skiptin.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.