Grænt ljós á mosku við Suðurlandsbraut

Kjartan Kjartansson skrifar 27. ágúst 2021 08:32

Teikning af bænahúsinu sem var lögð fyrir þegar umsókn Félags íslenskra múslima var samþykkt árið 2019. Félag íslenskra múslima

Borgaryfirvöld hafa veitt Félagi múslima á Íslandi leyfi til að reisa mosku við Suðurlandsbraut 76. Bænahúsið verður á tveimur hæðum og rúmir 677 fermetrar að stærð.

Þetta kemur fram í fundargerð bygginarfulltrúa og skipulagsfulltrúa Reykjavíkurborgar frá 24. ágúst. Mbl.is sagði fyrst frá í gær. Byggingin verður úr forsteyptum einingum. Neðri hæðin verður 598,3 fermetrar en sú efri 79,3 fermetrar.

Hugmyndir hafa lengi verið uppi um að reisa mosku á lóðinni við Suðurlandsbraut. Félag múslima fékk umsókn um bygginguna samþykkta árið 2019 en ekkert varð af framkvæmdum.

Borgaryfirvöld samþykktu að veita félaginu lóðina án endurgjalds árið 2013. Það varð að kosningamáli í borgarstjórnarkosningunum árið 2014 þar sem frambjóðandi Framsóknarflokksins vildi að borgin afturkallaði lóðina.

Trúmál Reykjavík Skipulag

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.