Fann ástina fjór­tán ára gömul í fermingar­veislu

Arna Petra er einn vinsælasti bloggari Íslands. Hún heldur úti YouTube rás ásamt því að blogga á síðunni Trendnet. Hennar betri helmingur, Tómas Ingi, er flugmaður og bregður honum gjarnan fyrir í myndböndum Örnu.

Þau Arna og Tómas voru  voru gestir í nítjánda þætti af hlaðvarpinu Betri helmingurinn með Ása sem hóf göngu sína síðasta vor. Umsjónarmaður þáttanna er Ásgrímur Geir Logason. Hann fær til sín þjóðþekkta einstaklinga ásamt þeirra betri helming og ræðir um ástarsambandið, lífið og tilveruna.

Í þættinum segja þau Arna og Tómas frá því þegar þau kynntust í fermingarveislu árið 2012, þá aðeins fjórtán ára gömul.

Pókaði hann á Facebook

„Ég sá hann bara og mér fannst hann svo sætur og ég hringdi í vinkonu mína og sagði henni frá því,“ segir Arna um augnablikið sem hún leit Tómas fyrst augum.

Stuttu síðar lágu leiðir þeirra saman á ný á páskabingói í Hvalfirði. Þá ákvað Arna að taka fyrsta skrefið og sendi Tómasi „poke“ á Facebook eins og tíðkaðist þá. Í kjölfarið ákváðu þau að fara á stefnumót.

„Svo fórum við bara að spjalla og hittumst svo. Við horfðum á Mannasiði Gillz, ógeðslega skrítið,“ segir Tómas og hlær.

Sambandið fór rólega af stað og segir Arna að þar hafi aldurinn spilað inn í og svo staðreynd að þau hafi bæði verið með útivistartíma.

Segist eiga erfiðara með að taka upp myndavélina á Íslandi

Í dag eiga þau níu ára farsælt samband að baki og bjuggu um tíma í Svíþjóð þar sem Tómas lagði stund á flugnám. Þar tók Arna sín fyrstu skref á YouTube fyrir tveimur árum síðan.

Blogg á myndbandsformi eru afar vinsæl í Svíþjóð og segist Arna hafa fylgst mikið með slíkum bloggum í þeim tilgangi að ná tökum á sænskunni. Áður en hún vissi var hún farin að búa til myndbönd sjálf.

„Þetta er svo stórt í Svíþjóð. Þannig að ég er alveg svona smá hissa að þetta sé ekki meira á Íslandi. En fólk er stressað og ég skil það líka vel. Ég á erfitt með að taka upp myndavélina hérna á Íslandi, á meðan í Svíþjóð er mér bara alveg sama.“

Hún segist lengi vel ekki hafa haft neitt upp úr YouTube myndböndunum sem fyrst um sinn voru aðeins hugsuð fyrir vini og ættingja.

„Maður þurti að bíða eftir að hafa náð X mörgum subscribers og X mörgum tímum sem var bara eitthvað ótrúlega mikið. Þannig þegar það var komið og maður var byrjaður að fá tekjur þá var maður svo sáttur sko.“

Deildi fæðingarferlinu með fylgjendum sínum

Arna og Tómas bjuggu í Svíþjóð í tvö ár en fluttu heim til Íslands þegar Arna varð ólétt á síðasta ári. Það má segja að þá hafi bloggið hennar Örnu sprungið út, ekki síst þegar hún deildi myndbandi frá fæðingu dóttur þeirra.

Hún segir það þó ekki endilega hafa verið ætlunina að deila svo persónulegri stund með fylgjendum sínum.

„Ég beið ótrúlega langan tíma með að taka upp minniskortið og fara í gegnum allar þessar upptökur. Ég beið alveg mjög lengi með það og ég held að fylgjendur mínir hafi ekkert verið að búast við því að ég myndi deila þessu. En svo vann ég myndbandið og ég var ekki búin að ræða það við Tómas að við myndum deila þessu,“ segir Arna.

Í dag eiga þau Arna og Tómas sjö mánaða gamla dóttur, Emilíu Birnu.

„Þegar maður er með ungabarn þá gleymir maður svolítið að rækta sambandið,“ segir Arna en þau Tómas reyna þó að vera dugleg að fara á stefnumót.

Í þættinum segir hún frá því þegar Tómas bauð henni á stefnumót til Akureyrar sem fór öðruvísi en ætlað var. Þá segja þau frá hinum ýmsu ævintýrum sem þau hafa upplifað á flakki um heiminn.

Hér að neðan má hlusta á viðtalið við þau Örnu og Tómas í heild sinni.