Lífið

Safnaði 1,5 milljón áður en hún lét raka hárið af fyrir Kraft

Hallgerður Kolbrún E. Jónsdóttir skrifar
Agla var snoðuð í dag en hún hefur safnað einni og hálfri milljón króna til stuðnings Krafts.
Agla var snoðuð í dag en hún hefur safnað einni og hálfri milljón króna til stuðnings Krafts. Vísir/Sigurjón

Hin tólf ára gamla Agla Björk Kristjánsdóttir rakaði í dag af sér hárið til styrktar stuðningsfélaginu Krafti en hún hefur safnað einni og hálfri milljón. Kraftur stendur Öglu mjög nærri en hún missti föður sinn úr krabbameini fyrir fjórum árum.

Agla setti söfnunina af stað fyrir tæpri viku síðan og var markmiðið að ná að safna hálfri milljón króna. Nú hefur hún náð markmiðinu og vel betur en það.

„Þegar ég fæddist var pabbi búinn að vera með krabbamein í tvö ár og var að klára lyfjameðferð. Hann barðist við krabbamein í ellefu ár og meðan á hans veikindum stóð þá gaf Kraftur okkur rosa mikið og mig langaði bara að gefa til baka með því að halda söfnun fyrir Kraft,“ segir Agla Björk.

Kristín Þórsdóttir móðir Öglu Bjargar segist mjög stolt afl þessu framtaki dóttur sinnar.

Kristín mamma hennar Öglu segist mjög stolt af stúlkunni sinni.Vísir/Sigurjón

Hvernig er þetta búið að vera?

„Heyrðu, þetta er bara búið að vera algert ævintýri. Hún er að sýna svo mikið hugrekki og staðfestu, hún er svo ákveðin þegar hún ætlar sér eitthvað og þetta svo sannarlega sýnir það,“ segir Kristín.

Agla var snoðuð í beinni útsendingu á Instagram-síðu Krafts og kveðjurnar og hrósin hrönnuðust inn. Og eftir dágóða stund var hárið allt fokið, en það náði Öglu alla leið niður á rass áður en klippingin hófst.

Jæja Agla, síðasti lokkurinn, hvernig er?

„Bara geggjað… já,“ segir Agla.

Kristín er lærður hárgreiðslumeistari og hjálpaði til við að klippa hárið af Öglu.Vísir/Sigurjón

Er ekkert skrítið að sé verið að klippa af þér hárið í beinni?

„Jú, mjög skrítið.“

Enn er hægt að styrkja Öglu og Kraft og hvetur hún fólk til að leggja hendur á plóg.

„Gáum hvort við náum þessu ekki upp í tvær milljónir.“

Hægt er að leggja söfnuninni lið með því að leggja inn reikningsnúmer 0545-14-004255 og kennitala er 221008-4050.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.