Vitað um einn Íslending enn í Afganistan

Atli Ísleifsson skrifar 16. ágúst 2021 12:41

Vestræn ríki hafa síðustu daga reynt að forða borgurum sínum frá landinu eftir að hver borgin á fætur annarri hefur fallið í hendur talibana. AP

Utanríkisráðuneytið þekkir til eins Íslendings sem sé enn staddur í Afganistan. Vonir séu bundnar við að hann komist fljótlega út landi.

Þetta staðfestir Sveinn H. Guðmarsson, upplýsingafulltrúi utanríkisráðuneytisins, í samtali við Vísi. Sveinn segir að um sé að ræða starfsmann NSPA (e. NATO Support and Procurement Agency), einnar undirstofnunar Atlantshafsbandalagsins NATO.

Sveinn segir að Íslendingurinn sé staddur í Kabúl. „Við erum í góðum samskiptum við hann og við fylgjumst vel með. Sem starfsmaður NATO er hann talinn öruggur.“

Vestræn ríki hafa síðustu daga reynt að forða borgurum sínum frá landinu eftir að hver borgin á fætur annarri hefur fallið í hendur talibana.

Talibanar tóku höfuðborgina Kabúl í gær fljótlega eftir að Ashraf Ghani, forseti landsins, flúði land. Íslömsku öfgamennirnir hafa náð nær öllum völdum í landinu á innan við viku, á sama tíma og bandarískt og alþjóðlegt herlið hefur verið að kalla lið sitt frá landinu.

Sveinn segir að fyrir um tveimur árum hafi alla jafna tveir til þrír Íslendingar í Afganistan sem störfuðu á vegum NATO.

Afganistan Íslendingar erlendis NATO

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.