Innlent

Ótrúleg breyting að hægt verði að aka börnum örugga vegi í skólann

Kolbeinn Tumi Daðason skrifar
Ingibjörg Birna Erlingsdóttir, sveitarstjóri Reykhólahrepps, segir íbúa á svæðinu afar sátta með leiðina sem farin sé enda hafi hún verið á skipulagi frá árinu 2010.
Ingibjörg Birna Erlingsdóttir, sveitarstjóri Reykhólahrepps, segir íbúa á svæðinu afar sátta með leiðina sem farin sé enda hafi hún verið á skipulagi frá árinu 2010. Vísir/Egill

Sveitastjóri Reykhólahrepps fagnar nýundirrituðum samningi Vegagerðarinnar við landeigendur Grafar í Þorskafirði sem gefur vegagerð um Gufudalssveit grænt ljós. Bættar samgöngur muni breyta öllu fyrir íbúa á sunnanverðum Vestfjörðum.

Vegagerðin skrifaði undir samning við landeigendur í gær en eigendur Grafar voru þeir einu sem ósamið var við. Jörðin Gröf er í Teigsskóg, stórum birkiskóg, hvar leggja á veg í gegn. Landeigendur hafa barist af krafti gegn lagningu vegarins árum saman vegna áhrifa á umhverfið. 

Á vef Vegagerðarinnar segir að landeigendur hafi, í kjölfar úrskurðar um framkvæmdaleyfi, unnið að því með Vegagerðinni að laga framkvæmdina sem best að landi innan landamerkja Grafar.

Áhrif á umhverfið verði lágmörkuð eins og kostur er.

Teigsskógur í Þorskafirði.Vegagerðin

„Við höfum ávallt haft trú á því að þetta myndi ganga eftir, að fólk myndi ná saman en auðvitað hefur þetta þá þýðingu að þessi framkvæmd getur orðið að veruleika. Það hefur verið lagt í þessa framkvæmd og farið af stað með hana í þeirri trú að þetta geti orðið. Framkvæmdin er komin vel á veg. Ég held að fólk hafi alltaf haft trú á því að þetta myndi ganga eftir á einn eða annan hátt,“ segir Ingibjörg Birna Erlingsdóttir, sveitastjóri í Reykhólahreppi.

Framkvæmdir við vegalagningu hófust sumarið 2020 með endurbyggingu Vestfjarðavegar frá Skálanesi í Gufudal sem gert er ráð fyrir að ljúki nú á næstu vikum. Verður þá rúmlega 5 kílómetra kafli Vestfjarðavegar lagður bundnu slitlagi. Í vor hófust svo framkvæmdir við þverun Þorskafjarðar frá Kinnarstöðum að Þórisstöðum og er bygging 260 metra langrar brúar að hefjast. Gert er ráð fyrir verklokum árið 2024.

260 metra löng brú sem þvera á Þorskafjörð. Svo mun vegurinn halda áfram í vesturátt, meðal annars í gegnum Teigsskóg þar sem jörðina Gröf er að finna.Vegagerðin

„Fyrir okkur í Reykhólahreppi býr fólk í Gufudalssveit og margt fólk sem sækir í Múlasveitina gömlu. Það eru flutningar með börn dagsdaglega alla daga ársins og fólk er að vinna og þetta fólk þarf ekki að fara yfir þessa hálsa og getur komið á öruggum vegum í vinnuna sína og skólann á hverjum degi. Þetta er þvílík breyting, alveg ótrúleg breyting,“ segir Ingibjörg.

Nú standi á ríkisstjórninni að halda fjármagninu að verkefninu svo framkvæmdin geti öll orðið að veruleika. Vegagerð sé vel á veg hafin en sjá þurfi til þess að verkefnið klárist.

Fallegur sumardagur í Reykhólahreppi.Vísir/Vilhelm

„Þetta mun breyta öllu fyrir fólk á sunnanverðum Vestfjörðum. Ég held að þessi aðgerð muni skila mestu til þeirra. Koma þessum vegum í nútímalegt lag. Að fólk geti ekið um á láglendisvegum að mestu. Það er náttúrulega Kletthálsinn eftir og fleiri en þessir vegir hafa náttúrulega ekki verið bjóðandi. Þeir eru barn síns tíma og löngu löngu komið að því að koma þessu í lag. Öll sú uppbygging sem á sér stað á sunnanverðum Vestfjörðum núna bíður eftir að framkvæmdin verði. Þetta hefur allt að segja með það.“


Tengdar fréttir

Sögunni endalausu um Teigsskóg virðist lokið með sögulegum samningi

Það vakti athygli margra síðdegis í gær að á meðan löngum ríkisstjórnarfundi um minnisblað sóttvarnalæknis stóð greindi samgönguráðherra frá langþráðum áfanga í vegagerð hér á landi. Vegalagning um Gufudalssveit væri fram undan en deilur um svæðið og nýjan veg þar um hafa staðið í tvo áratugi. Sagan endalausa virðist ætla að enda eftir allt saman.

Dynjandisheiði ekki í útboð á þessu ári vegna fjárskorts

Vegagerðin hefur fallið frá því að bjóða út stærsta áfanga nýs vegar yfir Dynjandisheiði í sumar þar sem ekki eru til peningar í verkið. Áformað er þó að bjóða út næsta áfanga vegagerðar um Gufudalssveit í haust.

Verktakinn byrjar þverun Þorskafjarðar í næstu viku

Verksamningur milli Vegagerðarinnar og Suðurverks um þverun Þorskafjarðar var undirritaður í dag. Vegamálastjóri segir þetta lið í gríðarlegum samgöngubótum á Vestfjörðum sem stytti leiðina milli Reykjavíkur og Ísafjarðar um fimmtíu kílómetra.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.