Segir við­brögð ríkis­stjórnarinnar fyrir neðan allar hellur

Þetta gerir Helga Vala í pistli sem hún birtir á Facebooksíðu sinni nú rétt í þessu. En Þórólfur hefur hvatt valdhafa til að grípa í taumana fyrr en seinna vegna sífellt fleiri sem smitast hafa af Covid-19, og þá einkum Delta-afbrigðinu.

„Það er ekki eitt, það er of margt alveg ruglað við atburðarrás síðustu daga. Það var vitað í fyrradag að það kæmu nýjar tillögur vegna fjölgunar smita. Þjóðin hefur fengið að bíða í tvo daga eftir því hvað gerist næst og hvaða takmarkanir verða settar á frelsi hennar,“ segir Helga Vala.

Hún segir jafnframt að í tvo daga hafi ríkisstjórnin verið meðvituð um þetta en virðist svo koma af fjöllum varðandi fundarstað.

Hellir sér yfir ríkisstjórnina

„Ekki virðist hafa komið til greina að halda fjarfund, eins og er orðið landlægt í heimsfaraldri annars vegar í þágu smitvarna og hins vegar til að koma fólki sem er á víð og dreif á einn og sama fundinn. Nei, þau velja að vera á Egilsstöðum, borga 800 þúsund fyrir flugvél undir þrjá ráðherra, sem virðast ekki hafa fengið fundarboðið nægilega snemma til að geta komið sér á staðinn eins og hinir? Hver er að skipuleggja þetta eiginlega?“

Róbert Marshall, upplýsingafulltrúi ríkisstjórnarinnar, segir í samtali við fréttastofu að Ernisvélin sem flaug með ráðherrana austur, hafi verið tekin á leigu til að fjölmiðlar kæmust með. En yfirvöld höfðu áður tryggt sér vél frá Mýflugi, en svo hafi á endanum voru það bara ráðherrarnir Áslaug Arna Sigurbjörnsdóttir, Þórdís Kolbrún Reykfjörð Gylfadóttir og Sigurður Ingi Jóhannsson auk ráðuneytisstjóra og fáeinna annarra sem fóru með vélinni.

Og Helga Vala spyr áfram: Hvers vegna fundað sé klukkan 16 á föstudegi? Hvað eiga skipuleggjendur hátíða og fjölskyldur í landinu að gera við upplýsingar undir kvöld á föstudegi?

„Er þetta gamla trixið að koma með vondar fréttir í lok viku til að þær týnist í helginni? Er ekki viss um að það trix náist núna og mér finnst þessi framkoma ríkisstjórnar eiginlega fyrir neðan allar hellur.“

Fjölmargir bíða niðurstöðu í ofvæni

Eins og meðal annars kemur fram á Vísi eru veitingamenn afar langeygir eftir því að fá að vita hvaða niðurstöður liggja fyrir eftir fundinn. 

„Ég er með risa tónleika í garðinum hjá Dillon á morgun. Dimma er að spila, Sprite Zero Klan og fleiri. Og nú er ég að hugsa hvort ég eigi að auglýsa? Á ég að ferja hátalara í garðinn? Það er óþægilegt að bíða og þá sérstaklega á föstudegi klukkan þrjú,“ segir Jón Bjarni Steinsson vert á Dillon. 

Þá er vitað að þeir sem standa fyrir útihátíðum eru milli vonar og ótta, hvað verður. Svo dæmi séu nefnd.