Viðskipti innlent

„Algjörlega galið“ að herða tökin á landamærunum frá sjónarhóli ferðaþjónustunnar

Tryggvi Páll Tryggvason og Elísabet Inga Sigurðardóttir skrifa
Jóhannes Þór Skúlason er framkvæmdastjóri Samtaka ferðaþjónustunnar.
Jóhannes Þór Skúlason er framkvæmdastjóri Samtaka ferðaþjónustunnar. Vísir/Arnar

Jóhannes Þór Skúlason, framkvæmdastjóri Samtaka ferðaþjónustunnar, segir að frá sjónarhóli ferðaþjónustunnar og þeirri efnahagslegri viðspyrnu sem fjölgun ferðamanna hér á landi veiti sé það „algjörlega galið" ætli stjórnvöld sér að herða tökin á landamærunum, líkt og sóttvarnalæknir hefur í hyggju að leggja til að verði gert.

Nokkur fjölgun hefur orðið á kórónuveirusmitum innanlands undanfarna daga en alls hafa 30 greinst með veiruna frá 1. júlí síðastliðnum. Þórólfur Guðnason sóttvarnalæknir hefur ekki í hyggju að leggja til hertar aðgerðir innanlands vegna þess. Hann segir þó að mikilvægt sé að herða tökin á landamærunum og vinnur hann nú að gerð minnisblaðs til heilbrigðisráðherra með ráðleggingum þess efnis.

Telur að áhrifin yrðu gríðarlega neikvæð

Jóhannes Þór segir í samtali við fréttastofu að það sé gríðarlega alvarlegt mál ætli stjórnvöld hér á landi að herða tökin á landamærunum, en Þórólfur vill að svo stöddu ekki gefa upp hvaða aðgerðir hann hyggst leggja til að ráðist verði í.

„Það er allt annað að gera það í dag á þessum tímapunkti þegar það er á næstu sex til átta vikum von á hundruðum þúsunda ferðamanna til landsins sem að hafa bókað ferðir á ákveðnum forsendum sem stjórnvöld hafa gefið út. Það hefur gríðarlega mikil neikvæð áhrif á ferðamennskuna og fyrirtækin og myndi setja virkilegan fleyg í viðspyrnuna sem er búið að koma hratt og vel af stað, hafa mjög alvarleg áhrif,“ segir Jóhannes Þór.

Óhætt er að segja að Jóhannes Þór sé ekki sáttur við þær hugmyndir sem Þórólfur hefur viðrað í þessum efnum, en hann hefur meðal annars nefnt að hægt sé að krefja þá sem koma hingað til lands um neikvætt PCR-próf.

„Ég verð að segja að frá sjónarhóli ferðaþjónustunnar og hinnar efnahagslegu viðspyrnu þá er þetta algjörlega galið,“ segir Jóhannes Þór.

Ferðamennirnir hafa snúið aftur í auknum mæli undanfarin misseri.Vísir/Vilhelm.

Bendir hann á að vel hafi gengið í bólusetningum hér á landi, stór hluti þjóðarinnar sé fullbólusettur og fullyrðir Jóhannes að það sama eigi við þá ferðamenn sem hingað komi til lands.

„Meirihluti allra sem eru að koma til landsins bæði Íslendinga og ferðamanna eru bólusettir. Þannig er komið í veg fyrir að stórum hluta samkvæmt upplýsingum frá heilbrigðisyfirvöldum alvarleg veikindi og gríðarlegt álag,“ segir Jóhannes Þór.

Nú þurfi stjórnvöld að taka stöðu með ferðaþjónustunni.

„Heilbrigðisyfirvöld hafa sjálf bent á að það þurfi að láta reyna á þessa stöðu. Ég tel að nú þurfi að stjórnvöld einfaldlega að horfa til hinna efnahagslegu sjónarmiða, ég tala nú ekki inn í haustið þegar ágúst og september eru jafn gríðarlega mikilvægir mánuðir framundan eins og raun ber vitni,“ segir Jóhannes Þór.

Spyr hvort menn séu hættir að treysta á mátt bólusetningar

Sem fyrr segir hefur Þórólfur minnst á kröfuna um neikvætt PCR-próf en einnig að hægt verði að taka sýni hjá sem koma hingað til lands og eru metnir líklegir til að valda hættu.

„Ég spyr bara, ef að þetta eru hugmyndirnar, eru menn hættir að treysta á mátt bólusetningana eins og svo mikið var talað um fyrir nokkrum vikum og mánuðum síðan að væri það sem að þyrfti til,“ segir Jóhannes Þór.

„Ef að menn ætla að bíða eftir því að veiran sé horfin úr öllum samfélögum alls staðar þá munum við búa við takmarkanir hér það sem eftir er,“ bætir hann við.

Laugardalshöll var breytt í fjöldabólusetningarmiðstöðVísir/Vilhelm

Vill Jóhannes meina að núgildandi kerfi á landamærunum hafi gefið sig vel.

„Eins og staðan er í dag þá eru allir sem ekki eru bólusettir undirsettir því að þurfa að koma til landsins, fara í tvær skimanir og fimm daga sóttkví. Þetta er kerfi sem hefur gefist afar vel og ég held að allir hér á landi, hvort sem er stjórnvöld eða sóttvarnaryfirvöld metið það sem gott kerfi, hafi skilað miklum árangri,“ segir Jóhannes Þór.

Stjórnvöld þurfi að íhuga vandlega hvort tilefni sé til að herða tökin á landamærunum, í það minnsta í tilefni þeirra sem þegar eru bólusettir.

„Það þurfa verulega alvarleg og sterk rök að liggja því til grundvallar ef að stjórnvöld ætla að setja auknar hömlur á bólusetta ferðamenn.“


Tengdar fréttir

Starfsmaður á Jómfrúnni greindist með smit

Starfsmaður Jómfrúarinnar greindist með kórónuveirusmit í gær og voru 24 starfsmenn veitingastaðsins sendir í skimun vegna smitsins. Þeir hafa allir verið bólusettir líkt og sá smitaði sem mætti síðast í vinnuna á mánudag. Einn starfsmaður hefur verið sendur í sóttkví.

Leggur til að aðgerðir verði hertar á landamærum á ný

Þórólfur Guðnason sóttvarnalæknir hyggst leggja til breytingar á sóttvarnaaðgerðum á landamærum í ljósi fjölgunar tilfella síðustu daga. Hann vinnur nú að minnisblaði til ráðherra en vill ekki gefa upp hverjar tillögur hans verða. 





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×