Rodríguez hetjan gegn bitlausum Úrúgvæum

Úrúgvæ var að spila sinn fyrsta leik á mótinu í fimm liða riðlinum en Argentína hafði gert 1-1 jafntefli við Síle á mánudaginn var.

Argentínumenn mættu umtalsvert ákveðnari til leiks þar sem þeir unnu Úrúgvæana iðulega í baráttunni. Þeir náðu að færa yfirburði sína í nyt þegar Guido Rodriguez, miðjumaður Real Betis á Spáni, skallaði fyrirgjöf Lionels Messi í stöng og inn eftir 13 mínútna leik.

Þrátt fyrir að hafa bæði Edinson Cavani og Luis Suárez í framlínu sinni gekk þeim úrúgvæsku bölvanlega að svara fyrir mark þeirra argentínsku. Úrúgvæar voru meira með boltann en tókst varla að skapa sér færi það sem eftir lifði leiks. Raunar náðu þeir ekki einu einasta skoti á markið allan leikinn.

Argentína vann 1-0 sigur og er liðið þá með fjögur stig, líkt og Síle, á toppi riðilsins. Síle vann fyrr í gærkvöld 1-0 sigur á Bólivíu þar sem Ben Brereton, leikmaður Blackburn Rovers og fyrsti leikmaður í sögu Copa America sem fæddur er í Stoke-on-Trent, skoraði sigurmark þeirra sílesku.

Úrúgvæ mætir liði Síle í næsta leik sínum á mánudaginn og þurfa að fara rækilega yfir sinn sóknarleik eftir daufa frammistöðu. Raunar hefur Úrúgvæ nú leikið fjóra keppnisleiki í röð án þess að skora, síðustu tveir leikir í undankeppni HM, gegn Paragvæ og Venesúela, fóru báðir 0-0 og á undan því töpuðu þeir úrúgvæsku 0-2 fyrir Brasilíu.