Tveir greindust innanlands og annar utan sóttkvíar

Atli Ísleifsson skrifar 14. júní 2021 10:46

Um 6.600 manns hafa nú greinst með kórónuveiruna innanlands frá upphafi faraldursins. Vísir/Vilhelm

Tveir greindust með kórónuveiruna innanlands í gær. Annar þeirra sem greindist var utan sóttkvíar, en hinn var í sóttkví.

Þetta kemur fram í uppfærðum tölum á síðunni Covid.is.

Í einangrun eru nú 33, en þeir voru 43 á föstudag þegar síðan var síðast uppfærð. Í sóttkví eru 63, en voru 104 á föstudag. 1824 eru í skimunarsóttkví. Einn er á sjúkrahúsi vegna Covid-19, en þeir voru tveir á föstudag.

Sjö greindust á landamærum í gær, þar sem tveir mældust með mótefni, en niðurstöðu mótefnamælingar er beðið í tilfelli fimm.

Nýgengi á smiti innanlands, þ.e. fjöldi smitaðra á hverja 100 þúsund íbúa undanfarnar tvær vikur, er nú 7,6, en var 9,3 á föstudag. Nýgengi á smiti á landamærum er nú 2,5, en var 2,2 á föstudaginn.

128.645 eru nú fullbólusettir hér á landi og er bólusetning hafin hjá 86.326 til viðbótar.

6.621 hafa nú greinst með kórónuveiruna hér á landi frá upphafi faraldursins í febrúar á síðasta ári. Af þeim sem greinst hafa með COVID-19 á Íslandi eru þrjátíu látin.

Alls voru tekin 153 einkennasýni hjá sýkla- og veirufræðideild Landspítalans og Íslenskri erfðagreiningu í gær. Þá voru 2766 sýni tekin á landamærunum eða í seinni landamæraskimun og 707 í svokallaðri sóttkvíar- og handahófsskimun.

Fréttin hefur verið uppfærð.

Faraldur kórónuveiru (COVID-19)

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.